17 июльышто Унчо кундемыште кугу пайрем гӱжлыш. Янык памаш воктенысе кеҥежымсе сценыште сӱан пайрем йӱлам модын ончыктеныт гын, Унчо кыдалаш школышто «Кидпашан корныжо» («Путь ремесла») форум эртен. Унчо ял урем мучко марий кудо-влакым погымо ыле.
Кӧмыт толыныт?
Регион-влак кокласе сӱан фестиваль-конкурсышто Татарстан кундемысе Шорамучаш ял гыч «Шишор» ансамбль, Чуваш республик гыч «Муркаш» ансамбль, Марий Эл Республикын Звенигово район Нуктуж клуб пеленсе «Сем аршаш», Тошто Торъял гыч «Ший оҥгыр», Шернур район Марисола гыч «Саскавий», Советский район Кужмарий клуб пеленысе «Эр ӱжара», Кужэҥер район Кугу Лаждӱр клуб пеленыысе «Марий сем», Морко район Шлань ял гыч «Эр кече», Унчо ял «Унчо ӱжара», Изи Кушна гыч «Кушна мланде», Изикугунур клуб пеленысе «Ӱшӱт сем», Шеҥше гыч «Ӱжара», Тыгыде Морко клуб пеленысе «Шӱмсем аршаш», Кӱчыкэҥер гыч «Изи шӱдыр» ансамбль-влак, Морко рӱдӧ клуб системын усталык коллективше, Медведево да Волжск кундемла гыч семӱзгар дене шоктышо коллектив-влак шке мастарлыкыштым ончыктеныт.
Кече шыратен ыш ончо гынат, но пайремым эртараш йӱр чаракым ыш ыште. Калык шуко погынен. Пайрем уна-влакым вашлийме гыч тӱҥале, вара коллектив-влак Унчо ял урем дене ошкыл эртышт да Янык памаш воктек чумыргышт.
Пайрем дене Морко администраций вуйлатыше А.Н.Голубков, Кугыжаныш Погынын депутатше Н.В.Пушкина, Морко район депутат-влак вуйлатыше Г.С.Хуснутдинов, Унчо ял кундем вуйлатыше И.М.Евсеев саламлышт. Унчо кундемын тӱҥ онаеҥже А.А.Яковлев сай тыланымашым каласыш. Кажне коллектив шке кундемысе йӱлам мастарын ончыктыш. Семӱзгар денат пеш чаплын шоктышт. Унчо калык да толшо уна-влак тиде кечым чон канен эртарышт. Самырык тукым тыгай йӱлам палышаш, вет ожнысо йӱласе кажне изи ужашыштыже туныктен каласыме, тачысе кечыланат келшен толшо.
Меат ушнышна
Самырык-влакын ешыште келшен илымаш сай пайремым шот дене эртарымаш гыч тӱҥалеш. Тиде фестивальыште Шлань клуб пеленысе коллектив сӱан калык дене ӱдырым налаш толмо, тыгодым пӧртысӧ йӱла, сӱанын ял мучко оведылан (ме лачак тыге ойлена кочкаш-йӱаш манмым) унала кайыме да ӱдырым капка марте ужатыме ужашым модын ончыктыш.
Сценарийым тоштер пашаеҥ Людмила Аксюбина возен, Шлань калыкын сӱан ойыртемжым келгынак шымлыме раш палдырныш. Пошкудыш оведылан наҥгайыме годым Шлань ял марий Мичук изайын мурымат шарналтен, а мый пошкудо лийынам, тудым муралтышым:
«Айдыза, родем-шамыч, мый декем каена,
Ковышта лемым кочкына,
Ковышта лемым кочкына да
Таве вӱдым йӱына».
Сӱан йӱлам ончыктымашке ӱдыр-рвезе-влакат ушненыт. Тидыже мемнам моткоч куандара. Унчо кундемысе самырык тукым кызытат марий сӱаным эртараш кумылан.
Марий мурымаш, куштымаш уло гын, марий йылмынат ок пыте, йӱланат ок йом. Самырык тукым тидым умыла, акла да аралаш тӱҥалеш манын ӱшанен илена.
«Сӱан йӱла» номинацийыште икымше верым Морко район Шлань тӱвыра пӧртын «Эр кече» ансамбльже налын. Саламлена!
Римма Петрова, Морко район Унчо школын туныктышыжо.
Авторын колтымо фотожо-влак.