2-8 март – Мӱшкыран улмо деке тӱткырак лийме арня.
Мӱшкыран улмо годым моткоч тӱткӧ лийман, вет ончыкылык ава шке икшывыжын тазалыкшылан негызым пышта. Мӱшкыраҥме деч ончычсо пагытыштат шекланыман. Тидын да моло нерген Марий Элысе Тазалык аралтыш министерствын тӱҥ акушер-гинекологшо Виктор Дробышев радамла.
Мӱшкыран ӱдырамаш аракам йӱэш (изи дозат лӱдыкшӧ лийын кертеш) але тамакым шупшеш гын, азан тӱрлӧ патологий вияҥеш, йоча колышат шочын кертеш. А тамакым шупшшо ӱдырамаш шукыж годым мӱшкыраҥын ок керт, мӱшкыраҥеш гынат, южгунам икшыве черле шочеш. Вет никотин плаценте гоч эрта да азан вӱрышкыжӧ логалеш. Электронный сигаретым тӱргымӧ тыгак мӱшкырысӧ азалан эҥгекым ышта.
Вате-марийла ондакак малаш тӱҥалме да абортым ыштыме исыр лиймашке да репродуктивный системысе чер-влак вияҥмашке шуктен кертеш. Вате-марийла малыме годым куснышо инфекций-влак мӱшкырысӧ азаланат пижын кертыт. Тыгай чер-влаклан кӧра ятыр годым ӱдырамаш ончыкыжым мӱшкыраҥын ок керт.
Йочам ышташ шонышо ӱдырамашын организмыштыже чыла вещества нормышто лийшаш. Таза йоча шочшо манын, мӱшкыраҥме деч ончычат, мӱшкыран улмо годымат пайдале кочкышым кочман.
Мӱшкыран ӱдырамашын организмжылан йод утларак кӱлеш. Азан вуйдорыкшо шот дене вияҥже манын мӱшкыраҥме деч 2-3 тылзе ончыч да мӱшкыран улмо годымат кечеш 200 мкг калий йодидым йӱман. Мӱшкырысӧ азан нервный трубкаже экшык деч посна вияҥже манын – фолиевый кислотам (мӱшкыраҥме деч 2-3 тылзе ончыч да, мӱшкыраҥмеке, 14 арня кажне кечын 400-800 мкг дене).
Физический нагрузко шотышто мӱшкыран улмо годым врач дене каҥашыман. Капкыллан чын нагрузкым пуымо дене мӱшкыран улмо пагыт сайын эрта да, азам ыштымекат, ӱдырамашын организмже писын пеҥгыдемеш.
Марий Элысе Тазалык аралтыш министерствын архивше да freepik сайт гыч налме фото-влак.