Йоча годым могай профессийым ойырымо шотышто шонымаш шуко еҥын ала-мыняр гана вашталтеш. А южо айдеме изинек кӧ лиймыж нерген пала. Теве марий врач Елена Михайловна Ягулбаеван Оксана ӱдыржӧ изиж годымак врач лияш шонен пыштен. Ӱдырамаш-влакын пайремышт вашеш ава да ӱдыр дене врач профессий да моло нергенат мутланышна.
Врач-педиатр
Елена Михайловна Шернур район Шӱкшер ялыште шочын-кушкын. Памашсола школысо кандаш класс деч вара Шернур кыдалаш школыш тунемаш каен. Школыштак медицинылан шӱмаҥын. Саратов оласе мединститутыш тунемаш пурымеке, врач профессийым эшеат чот йӧратен шынден. 1984 ийыште мединститутын педиатрический факультетшым тунем пытарымеке, Йошкар-Оласе йоча эмлымверыште интернатурым эртен. Елена Михайловна распределений почеш Морко район Шеҥше селасе участковый эмлымверыш (кызыт врачебный амбулаторий) логалын.
– Йочам годым ньога-шамыч дене жапым эртараш, нунын дене модаш йӧратенам. Тукым акам икшыве-шамычым тынар чот йӧратет гын, врачлан тунемаш кай манын икана темлен. Мый тудын мутшым колыштынам да мединститутыш тунемаш пураш кыртмен ямдылалтынам. Ик ганат тидлан ӧкынен омыл.
1985 ий гыч 2008 ий марте педиатрлан пашам ыштенам, индеш ий участковый эмлымверын тӱҥ врачын пашажым шуктенам. 2007 ийыште «общий практикан врач – еш медицине» у спецализацийым – налынам да таче мартеат еш врач семын пашам ыштем. Пенсийыш каяш жап шуын. Содыки 40 ий медицине аланыште тыршем, – ойла Е.Ягулбаева.
Елена Михайловнан мутшо почеш, чын врач поро, черле еҥым колыштын да умылен моштышо, сайын, радамлын умылтарен кертше лийшаш. Е.Ягулбаева пашашкыже уло чонжым пышта.
– Нылле ий пашам ыштыме жапыште тӱрлыжат лиеден. Ончыч участковый больницыште стационар ыле, туштак икшыве-влакым эмлыме. Тунам ялла гыч шуко йоча тыште пневмоний дене киен. Нунын коклаште бронхиальный астман кок изи ӱдыр лийын. Чӱчкыдын приступ дене орланеныт. Эре нуным онченам, ласкан шӱлаш тӱҥалмекышт веле мӧҥгӧ каем ыле. Авашт таче кечынат
мылам тауштат.Йоча-влак тӱням эре шымлат: тӱрлым тамлен ончат, кӱлеш-оккӱл арверым кучылтыт. Амбулаторийышкына аяргыше икшывымат конденыт. Шуко гана йочан нер да пылыш гыч тӱрлӧ тыгыде предметым луктынна. Кызыт вашкеполышын тыршымыжлан кӧра вызов шагалемын, но кагаз паша ешаралтын, – каласкала Е.Ягулбаева.
Елена Михайловна распределений почеш Шеҥшыш пашаш толмеке, тыштак шӱм пелашым муын. Пелашыж дене коктын ик ӱдыр ден кок эргым ончен-куштеныт. Йӧратыме еш, куаным кондышо паша, уныка-влак марий ӱдырамашым пиаланым ыштат.
Дерматолог, косметолог
Елена Михайловнан Оксана ӱдыржӧ, аважым ончен, медицине корным ойырен. Тудо дерматолог да косметолог. Оксана Васильева 2015 ийыште Чуваш кугыжаныш университетын медицине факультетшым тунем пытарен. Кызыт самырык врач Йошкар-Оласе ик медицине рӱдерыште дерматологлан пашам ышта. Тудо каласкала:
– Йоча годым авамын пашаштыже эре лийынам. Тунамак медицинын кӱлешлыкшым умыленам, пайдажым ужынам. Медициныште пашам ышташ куштылго огыл, эре тунемман, шуко палыман. Врач лияш – чап, но тыгодым тиде ответственный паша. Медицине ик верыште ок шого, тудо эре вияҥеш, эмлыме у йӧн да технологий лектыт. Тидыжак мыйым ты аланыште сымыстара. Еҥ-влаклан полшаш, чер деч утлаш ӱшаным пуаш – чыла тиде профессийым ойырымо годым негызым пуэныт. Чуваш кугыжаныш университет деч вара дерматовенерологий дене интернатурым эртенам. А 2020 ийыште косметолог квалификацийым налынам. Тыге 2021 ий годсек эше
врач-косметологлан пашам ыштем.Дерматовенеролог коваште да венерический, ӱп чер-влакым эмла. Коваштыште новообразований диагностикым ышта, доброкачественный новообразованийым кораҥда. Косметологат – шкешотан профессий. Косметологий – моторлык, тазалык да гармоний шотышто науко. Тӱжвал сыным эскерен, коваште моторлыкым шотыш конден, айдеме утларак шке вийжылан, моторлыкшылан ӱшанаш тунемеш. Косметолог ты ӱшаным черлыеҥлан пуа. Кызытсе косметолог дерматологий, анатомий, физиологий, психологий аланлаште шинчымашыжым эре келгемдышаш. Клиентын кумылжым, тудын мо деч лӱдмыжым шижын да умылен моштышаш.
Мый декем тӱрлӧ проблеме дене толыт. Мутлан, шуко самырык еҥ акне дене орлана. Тыгай айдемылан косметологий дене кылдалтше процедурым ом темле. Акне – тиде чер, сандене тудын дене эн ончыч дерматолог деке кайыман. Врачын темлымашыжым шуктымеке веле косметолог деке толман.
Косметолог утларакшым ӱдырамаш-шамычлан веле кӱлеш манме шонымаш йоҥылыш. Кызытсе саманыште пӧръеҥ-влакат косметолог деке коштыт. Вет кажне еҥ мотор да таза коваштан лийнеже.
Врач династийым умбакыже Оксанан икшывыже-влакат ала шуят. Вет нунын ковашт, авашт веле огыл
врач улыт, ачаштат Андрей Геннадьевич стоматологлан тырша.