«Тылат кӧра», «Кумылем шылтен ом мошто», «Ом кӱл тылат», «Мӧр пеледме пагыт» – нине муро-влакым самырык рвезе Данила Коротков йоҥгалтара. Рвезын уло шке стильже. Данила самырык тукымлан келшыше мурым мура, утларакшым, конешне, йӧратымаш нерген.
Мураш йӧратыше еш
Д.Коротков Йошкар-Олаште шочын-кушкын. Ачаже – Волжск ола гыч марий, а аваже – Морко район Ердӱр гыч. Коротковмыт ешыште профессионал музыкант иктат уке, но чылан мураш йӧратат. Ик пайремат марий муро, марий сем деч посна ок эрте. Сандене рвезе изинек марий тӱвырам, йылмым йӧратен кушкын.
– Йочасадыш коштмо годым концертлаште эре муренам. Школыштат выступатленам, оласе, республикысе муро конкурслаште мастарлыкем ончыктенам. Йоча годым утларакшым руш мурым муренам. Кугурак лиймеке, шочмо йылмем дене мурымем шуын. Марий тӱвыранам аралымашке да вияҥдымашке мыят надырым пышташ шоненам. Вет калыкнан ончыкылыкшо – самырык-влакын кидыште. Кугезе коча-кованан сугыньыштым ме, у тукым, шуктышаш улына, – манеш Данила.
Каласыман, Данилан Богдана шӱжаржат музыклан шӱман. Коктын нуно «Юкече» йоча вокал ансамбльыште муреныт. ВК музык платформышто «Кушто-кушто куштымаш» мурыштым колышташ лиеш. Кызыт Богдана Йошкар-Оласе медицине колледжыште тунемеш. Уло жапшым тунеммашлан ойыра.
Марий эстрадыш корно
Д.Коротков индеш ияшыж годым «Юкече» ансамбльыште вич ий наре мурен. 2024 ийыште ансамбль шаланымеке, Данила шкет мураш кумылаҥын. Мурызо каласкала:
– Икымше наставникем палыме мурызо да композитор Светлана Альбертовна Яндукова лийын. Тудак мыйым мураш, йӱкым чын шындаш туныктен. Кызыт Волгатехын студентше улам. Тушто виян мурызо Эльвира Андреевна Трифонова дене вокал дене заниматлем.
Пытартыш кок ийыште мурызо семын кушкынам, шонем. Икмыняр мурем лектын, музык дене кылдалтше шуко материал, опыт погыненыт, тӱҥжӧ – умбакыжат муро аланыште тыршаш вий ешаралтын. Поэт да композитор-влак дене палыме лийынам, студийыште мурым возаш йӧным муынам.
Ӱмаште «Ший памаш» регион-влак кокласе фестиваль-конкурсышто участвоватленам. Тидым кугу опытлан шотлем. Икымше лийын омыл гынат сеҥыше-влак радамыш логалынам. Уло куш кушкаш да вияҥаш.
Мурем-влаклан семым утларакшым Светлана Яндукова келыштарен. Тыгак Вячеслав Осипов дене пырля пашам ыштыме. Кызыт шкежат семым возаш тӱҥалынам.
Мурем-влакын авторышт – Лидия Иксанова, Зоя Висвис, Антонида Щербакова. Пытартыш лекше «Марий вайб» муремлан мутым авам Алёна Короткова возен. Сандене ты муро мылам эшеат чот шерге. Южо автор почеламутым шке мылам темла, мый шкежат марий поэзийым лудам да умылем: теве тиде почеламут гыч сылне мурым возаш лиеш. Поэт, композитор да мурызо коклаште эре усталык диалог уло. Авторын мутшым семлан, мыйын йӱкемлан келыштарена, иктаж-могай вашталтышым пуртена.
Кызыт у муро-влакым ямдылем. Тиде – марий такмак-влак. Тудын авторжо – Лидия Иксанова, а семжым шке келыштаренам. Да руш мурым ямдылем. Мутшымат, семжымат шке возенам. Муро поп стилян – куштылго, сылне семан да кызытсе саманлан келшыше аранжировкан лиеш.
Студент, футболист
Самырык мурызо Волгатехыште Управлений да право факультетыште «Государственное и муниципальное управление» специальность дене икымше курсышто тунемеш. Университетын илышыштыже чолгалыкшым эре ончыкта. Тыгак футболла модеш, йӧратыме футбол команде-влакын матчыштым ончаш йӧрата. Яра жапше годым йолташыже-влак дене погынен, футбол пасуш модаш лектыт.
Рвезе чӱчкыдын ача-аважын шочмо верышкышт коштеш, вет тушто тудым эре шокшо мелна дене вучат.
Еш альбом гыч налме фото.