Южгунам суд пристав-влак нерген сырен ойлымым колаш логалеш. Нуно еҥын погыжым поген налыт манын вурсат. Тидыже ик могырым лач тыге коеш. Нуно кажне еҥ деке, кажне суртыш огыт кошт, парымым пӧртылташ мондышо-влак деке гына мият. Сандене кеч ГИБДД-н штрафше, кеч алимент лийышт – жапыштыже тӱлаш кӱлеш. Мутлан, суд пристав-влакын ойлымышт почеш, ик пӧръеҥ вес элыш пел ийлан илаш каяш тарванен, садлан алиментым пел ийлан ончылгоч тӱлен коден.
Шукерте огыл Суд пристав-влак службын Марий Элысе управленийжын тӱҥ суд приставше А.Ю.Иванов 2018 ийысе паша дене палдарен.
329 тӱжем паша идалык жапыште исполнительный производствышто лийын: 84 тӱжем – ГИБДД-н штрафше, 4 тӱжем – тӱлыдымӧ пашадар, 19 тӱжем – тӱлыдымӧ кредит, 21 тӱжем – ЖКХ парым, 6 тӱжем – алимент да молат.
Штрафым тӱлымӧ шотышо у йӧным кучылтмылан кӧра, производственный паша шагалемын. 20 кече жапыште парымым 50 %-лан шулдынрак тӱлаш лиеш. Тыгак ГИБДД-н эртарыме рейд-влак штрафым шагалемдаш полшат. Кызыт корнышто шонымо семын чыла транспортым огыт шогалте. Кӧн тӱлышаш парымже уло, тугай еҥын автомашина номержым возен налыт да шогалтат. А парым уло-укем суд пристав-влакын сайтыштышт тергаш лиеш. Пытартыш тергымаш почеш тиде йӧн дене 4216 еҥ пайдаланен. Кызыт тиде сервисым утларак кумдаҥдаш тыршат.
Идалык жапыште кажне суд приставлан кок тӱжем утла исполнительный производство логалын. 2018 ийыште службо пашаеҥ-влак 2,1 млрд.теҥге оксам пӧртылтеныт. Чылаже тиде пашам 150 еҥ шуктен толеш.
2017 ий дене таҥастарымаште, алиментым тӱлаш торешланыше-влак 3,8 %-лан шагалрак улыт гынат, йодыш садак ятыр. Тидыже 6,5 тӱжем тергыме паша. Тышеч икмыняр ужашыже шукталтын, 39 млн.теҥге алиментым тӱлыктымӧ. Тыгак пашадарым тӱлыдымӧ организаций-влак 44 миллион теҥге оксам пашаеҥ-влаклан пуэныт.
Оксам тӱлыдымӧ, шылын коштшо-влакат улыт. Нуным кычалаш да парымыштым пӧртылташ – тиде службынак пашаже. Идалык жапыште 370 тыгай еҥым пален налме.
Россий мучко 230 коллекторский организаций уло. Марий Элыште тыгай уке, сандене тиде пашам Суд пристав-влак службо шукта. Тыгодым палыман: коллектор ден «должник-влак» арняште ик гана веле вашлийын кертыт; суткаште ик йыҥгыр деч шуко лийшаш огыл.
Икманаш, штрафым да моло парымым жапыштыже тӱлыза да шарныза: суд пристав-влак тыгаяк айдеме улыт, нуно шке пашаштым шуктат!
Шке йочаланат оксам чаманат
Йошкар-Олаште илыше кок йочан ава шуко жап алиментым тӱлен огыл. Парым 500 тӱжем теҥге погынен. Кок икшывыжат йочапӧртыштӧ ила. Ондак авалан 40 шагат исправительный пашам ышташ кӱштеныт, но ӱдырамаш тидым шотыш налын огыл. Кызыт тудын шотышто уголовный пашам тарватыме.