Тачысе саманыште ялласе самырык пашаеҥ-влак у йӧн-влак нерген пален налышт да туддене пайдаланышт манын, элыштына «Российский союз сельской молодёжи» мер организаций (кӱчкынжӧ РССМ але ушем манына) ышталтын.
Верысе пӧлка нерген
Ял ден селаласе пашаеҥ-влаклан ятыр кугыжаныш полыш пуалтеш. Мутлан, туныктышо-влаклан ЖКХ услугылан компенсаций тӱлалтеш; ялыште физкультурно-спортивный паша шотышто вуйлатыше ден организатор-влаклан, верысе инициативылан грант-влак темлалтыт; илыме верым саемдаш полшат; фермер да кооператор паша-влакым виктараш тӱҥалше еҥ-влаклан субсидийым да льготный кредитым пуат.
РССМ-ын Марий Элысе пӧлкаже 2018 ий мартыште ышталтын. Тудым Волжск олаште шочшо Линар Гафиятуллин вуйлата. Алмаштышыже Софья Аникина ден регионысо пӧлкаште пашам шуктымо шотышто вуйлатышын алмаштышыже Евгений Приказа Йошкар-Олаште илат. Лач нуно ты ушем нерген каласкалышт. Республикысе пӧлкаже ышталтын веле, а Российысе ушемлан тений 5 декабрьыште 11 ий темын. Тудым РФ Общественный палатын членже, Калык фронтын общественный советшын да моло икмыняр советын членже Юлия Оглоблина вуйлата.
Проект-влак шотышто
Кызыт Российын тӱрлӧ кундемлаштыже ты ушемын пӧлкаже-влак ышталтыныт. Тӱҥ шотышто нуно шке кундемлаштышт федеральный, тыгак региональный проект-влак почеш пашам ыштат.
Кундемысе мер ушемыште кызыт пашам Л.Гафиятуллин, С.Аникина, Е.Приказа да П.Стариков ворандарат. Ялыште амалкалче але фермер пашам тӱҥалме шотышто шочмеке, ятыр йодыш шочеш. Чынак мо ялыште илыше-влаклан 1 процентан ипотекым налаш лиеш? А молан тыгай изи процент? Кузе кресаньык-фермер озанлыкым почаш, кушеч тӱҥалаш? Кузе лунчырген толшо ялым тӱзаташ? Лачак «РССМ» мер организацийын еҥже-влак тидлан могай корно-влак улмо нерген каласкален да саде йодыш-шамычлан вашмутым муаш полшаш кумылаҥыныт.
Нине теме-влакымак «Своё дело в село – смело» проект тарвата. Кызыт ушемын еҥже-влак тӱрлӧ районлаште илыше самырык тукымлан тидын нерген каласкаленыт.
Тений идалык тӱҥалтыште Российыште да тыгодым Марий Элыштат «Начинающий фермер» интеллектуальный модыш лийын. Тудо 2012 ий годсек аграрный образовательный организацийлаште эртаралтеш да тусо тунемше-влакым ялозанлыкыште бизнес-планированийым ышташ туныкташ, менеджмент да вуйлатыме сомыл-влакым умылтарат. Тыгак ты мероприятий командыште пашам ышташ, уверым погаш да иктешлымашым ышташ туныкта. МарГУ-н ныл командыже таҥасен, но кызытеш федеральный конкурсыш лектын кертме огыл.
Вашкылым ыштынешт
РССМ-ын Марий Элысе пӧлкажын чолга еҥже-влак Ялозанлык да продовольствий министерстве, тудын пелен шукертак огыл ыштыме «Центр компетенции в сельскохозяйственной кооперации и поддержки фермеров РМЭ» АНО-лан да МарГУ-н Аграрно-технологический институтшылан эҥертен пашам ыштат. Нунын дене пырля кугыжаныш полыш да проект-влак дене кылдалтше тӱрлӧ пашам ворандарат.
Активист-влак рӱдолаште самырык-влак дене пашам ыштыше организацийлашке миен коштыт, паша планышт нерген каласкалат, иктаж мероприятийым пырля эртарыме нерген шонкалат. Лач тыгаяк вашлиймаш 2 декабрьыште «Кугарня» газетын тӱҥ редакторжо-директоржо Э.А.Иманаев дене лие.
Тӱҥ шотышто мер ушемын членже-влак районлашке чӱчкыдынак лектын кошташ тыршат. Декабрь тӱҥалтыште Ольга Аникина ден Евгений Приказа У Торъял ден Параньга районласе самырык еҥ-влак дене вашлийыныт. Каласыман: Ольга кызыт МарГУ-што «Ялозанлык продукцийын технологшо» специальность дене шинчымашым налеш, а Евгений зоотехниклан тунем лектын.
Нуно нине вашлиймашлаште ялозанлык профессий, села ден ялла-влакын арулыкышт, поро пашам шуктымо шотышто да моло проект почеш пашам шуктымышт дене палдарат. Тылеч посна чолга еҥ-влакым тӱрлӧ проектлашке ушнаш ӱжыт.
Рамкыш:
Кундемысе пӧлка дене кылым кучаш але пӧлкан пашаж нерген утларак пален налаш шонышо-влаклан интернетысе кок лаштыкым ончалаш темлат: https://vk.com/rssm_mariel, https://www.instagram.com/rssm_mariel.
Эльвира Терентьева.