Тыгай лӱман XII республиканский форум 19 апрельыште Марий кугыжаныш университетыште эртен. Тудым Марий Элысе образований да шанче министерстве, Йошкар-Ола администрацийын образований управленийже, Андре Мальро лӱмеш 26-шо №-ан гимназий да МарГУ эртареныт.
Форумым почмыж годым Марий кугыжаныш университетын ректоржo М.Н.Швецов француз йылмын кӱлешлыкшым палемден да лишыл тунемме ийлаште МарГУ-ш французла кутырышо студент-влакын ешералт толмышт нерген увертарен.
Форумышто республикын тӱрлӧ школлаж гыч туныктышо ден тунемше-влак, МарГУ-н преподавательже, тӱрлӧ элла гыч шинчымашым погаш толшо да французла кутырышо студент-влак пашам ыштеныт. Латшым секцийыште 180 еҥ докладым лудыныт, презентацийым ончыктеныт. Лончылымо йодыш-влак Россий-Франций-Марий Эл тематике дене кылдалтыныт, сымыктыш, сылнымут, лингвистике, лингвокультурологий, биологий, спорт, медицине аспект-влакым тарватеныт.
Форумышто эше руш да йот йылме-влак дене возымо произведений негызеш ямдылыме сочинений конкурс, «Кызытсе образованийысе тӱвыра-влак кокласе компетенцийын йодышыжо» лӱман йыргешке ӱстел эртеныт. Форум XXIX француз муро фестиваль дене мучашлалтын. Сеҥыше-влак Марий Эл образований да шанче министерствын грамотшо дене палемдалтыныт.
И.Г.Иванова, филологий науко кандидат,
МарГУ-н доцентше,
Ф.Я.Хабибуллина, педагогике науко кандидат,
МарГУ-н доцентше.