Кеҥеж пагытыште кажне кумшо еҥ велосипед дене кудалыштеш. Тыгодым тиде пагытыште кок ораван транспортым чӱчкыдынрак шолыштыт. Тыгай ситуацийыш логалаш огыл манын, теве мом шотыш налман:
велосипедым орол але видеонаблюдений улмо вереш гына кодыза;
подъездыште ида кодо. Кодовый замок але домофон улмат шолышташ шонышым огеш чактаре. Пытартыш жапыште лач подъездла гыч луктын наҥгаят;
тошкалтыш площадкыште сурален кодеда гынат, пӧртылмыланда велосипед верыштыже шогаш тӱҥалеш манын ӱшан шагал;
верым тӱткын ончыза. Йолышташ шонымо верым эскералза. Мутлан, иктаж пучыш пижыкташ шонеда гын, тудо ӱшанле але уке, ончалза.
калык погынымо верлаште: кевыт, йочасад, школ воктене – кок ораван транспортдам ида кодо;
кӱчык жаплан велосипедым кодеда гынат, суралаш ида ӧркане;
велосипедын «ойыртемжым» шарнен кодса. Але шкеак палым ыштыза. Мутлан, шинчалан койдымо верыште иктаж палым сӱретлыза. Фотом ыштеда гын, эшеат сайрак. Велосипедым шолыштыт гын, кычалаш куштылгырак лиеш.
Марий Эл Республикысе МВД-н пресс-службыжо.