Лач тунемме пагыт годым шуко ӱдыр-рвезе коклаште волгыдо йöратымаш тул ылыжеш. Южо самырык еҥ тидым кӱчык жаплан гына шижеш, келшат да ойырлат, весе ӱмырешлан тиде шижмаш дене ила да йöратымашым уло чонжо дене перега. Икмыняр жап гыч волгыдо шижмаш дене вӱдылалтше самырык мужыр ешаҥеш, шочшан лиеш. Лач тыге Йошкар-Олаште илыше Акпатыревмыт еш шочын.
У Торъял район Тошто Торъял кундемын ӱдыржö Екатерина ончыкылык пелашым Марий кугыжаныш университетыште тунеммыж годым вашлийын. Самырык ӱдырамаш шкеж нерген тыгерак каласкалыш:
«Изи годсек ача деч посна кушкынам, нелылыкымат чытен лекташ логалын. Авам Эльвира акам ден когыньнам шкетын ончен куштен. Акам дене келшен илена, кеч-кунамат ваш-ваш эҥертен, полшен шогена. 11-ше классым тунем пытарымеке, кӱшыл шинчымашым налаш шонен, Йошкар-Олашке кайышым. Марий кугыжаныш университетын Финн-угроведений (кызыт Калыкле тӱвыра да тӱвыра кокласе кыл) институтысо марий да англичан пöлкашке туныктышылан тунемаш пурышым. Тӱшкагудышто пöлемыште кум ӱдыр иленна, коктын Морко район гыч лийыныт. Пырля илыме Зинуш йолташ ӱдыремын келшыме рвезыже аграрный колледжыште ончыкылык пелашем дене пырля тунемын. Тыге йолташ ӱдыремлан кöра тудын дене палыме лийынам, келшаш тӱҥалынна. Миша – Марий Турек район Акпатыр ял гыч. Армийышке ужатенам, пöртылмыжым вученам. Вара марлан лектынам. Тений кеҥежым сӱан лиймылан 8 ий темеш».
Катя Йошкар-Оласе «Домисолька» частный йочасадыште воспитательлан пашам ышта, пелашыже – Йошкар-Оласе 1-ше номеран изоляторышто. Нунын Анна ден Никита йочашт улыт. Ӱдырышт 1-ше классыште тунемеш, эргышт йочасадыш коштеш. Екатерина йоча-влак дене эре заниматла, поснак ӱдыржö дене шинчылташыже логалеш. Анюта школышто эртаралтше конкурслаште участвоватла, сӱретлаш моткоч йöрата. Акажын сӱретлымыжым Никита шольыжо ужеш да кидышкыже карандашым кучен шинчеш, альбомышко шке семынже сӱретлаш тöча. Изи рвезылан утларакшым модыш машина дене модаш келша.
Катя ден Миша коктынат пашам ыштат гынат, йоча-влаклан жапым ойыраш эре тыршат. Ешге Курчак театрышке спектакльым, кинотеатрышке южгунам коштыт. Каныш жаплан ялышке унала ковашт деке кудалыт, родо-тукымышт декат миен толаш огыт мондо. Акпатыревмыт жапым пайдалын эртараш тыршат.
Кок шочшан ӱдырамаш пелашыж ден шочшыжо-влакым тамле кочкыш дене сийлаш тырша. Чӱчкыдын сочним, шарлоткым, пиццым кӱэштеш, южгунам торык когыльо ден чак-чакымат ышташ пижеш. Катя пеледышым ончаш йöрата, сандене пачерыштыже шуко тӱрлö пеледыш кушкеш.
Кызыт Акпатыревмыт еш пачерым айлен ила, но пачерым налаш шона. Екатерина ден Миша коктын ваш умылен, икте-весылан эҥертен илат. Нуным ончет да шонет: вате-марий чурийвылышышт денат икгайрак койыт.«Ешыште вате-марий икоян лийыт, икте-весым колышт моштат, умылен илат гын веле, еш пеҥгыде лиеш», — мане самырык ӱдырамаш.
