Владимир Викторович Стемплевский 1979-1982 ийлаште Афганистаныште служитлен. 1981 ийыште сусырген, II группо инвалидностьшо уло.
Тазалыкше начарештын гынат, Владимир Викторович вуйжым сакен огыл. Тудо Республикысе военкомат пелен кокымшо пачашыште тоштерым почын. Кызыт тушто тӱрлӧ военный вургемым, оружийым, макет-влакым ужаш лиеш.
Тоштерын пойдаралтмыжым шарналташ гын, чылажат 26 ий онычыч тӱҥалын. Афган сарым эртыше инвалид-влаклан реабилитационный рӱдерыште Афганистанын флагшым В.В.Степлевскийлан пӧлекленыт. Флагым шке гаражышкыже сакен. «Тушкак беретем вераҥдышым. Моло ӱзгар-влакымат изин-изин погенам. Мыйын пашам нерген эркын-эркын мом-гынат пален налын, пырля служитлыше-влакат колташ тӱҥалыныт. Гаражыште шыгыр лийын, сандене «Инвалиды войны Афганистана» организацийын председательже деке полышым йодын миенам. Тудо Республикысе военныйкомиссар дене мутланен да тоштерым военкоматыш кусареныт. Комиссар мыйым тоштер вуйлатышылан шогалтен. Ынде мый школышто тунемше ден призывник-влаклан экскурсийым эртарем», — мане тудо.
Мемнан мийымына годым 7-ше классыште тунемше-влак экскурсийыш толыныт ыле. Владимир Викторович чыла ӱзгар, вургем, оружий нерген шуко да оҥайын каласкален кертеш. Тунемше-влакат тудым тӱткын колыштыныт. А пытартышлан сайын тунемышт манын, мыскара йӧре каласыш: «Удан тунемыда гын, 4 ий гыч, 18 ийым темымекыда, тыште вашлийына».