11 март гыч МЭТР-ын ямдылыме телепередачыже-влакым кок пачаш шукырак ужын кертына. Кызыт могай передаче кайымым интернетыште МЭТР-ын сайтыштыже муаш лиеш. Лишыл жапыште нине передаче-влакым тӱрлӧ вере ужаш, газетлашке савыкташ йӧн лиеш, ӱшандарышт коллеге-влак.
Российыште илыше еҥ-влак телевиденийын цифровой йӧнжӧ дене 2009 ий годсек пайдаланат. Тыгай форматлан кӧра канал-влак сайрак качестван лийыныт.
Кызыт элыштына кок мультиплексым ыштыме. Икымше да кокымшо мультиплексыш пурат: «Первый канал», «Россия 1», «Матч ТВ», НТВ, «Пятый канал», «Россия-К», «Россия 24», «Карусель», «ОТР», «ТВ центр», РЕН ТВ, «Спас», СТС, «Домашний», ТВ-3, «Пятница», «Звезда», «Мир», ТНТ, «Муз-ТВ». 2015 ий годсек кабельный оператор-влак чыла нине 20 каналым яра ончыктат.
А региональный канал-влак ны икымше, ны кокымшо мультиплексыш огыт пуро. Нуно кумшо мультиплексыште улыт.
2016 ий кыдалне «О средствах массовой информации» ден «О связи» законышко вашталтыш-влакым пуртымо шотышто Кугыжаныш Думыш законопроектым темлыме да ты кеҥежымак законым лукмо. Тидлан кӧра ятыр регионышто цифровой мультиплексыште улшо 20 федеральный канал деч вара 21-ше каналым (але тудым 21-ше кнопко маныт) ыштыме. Чыла нине канал-влакым элысе связь оператор-влак яра шаркалышаш да яра ончыктышаш улыт.
Кызыт 80 наре кундемыште региональный канал пашам ышта. Маррий Элыште «МЭТР» телеканал 2018 ий январьыште шочын. Кабельный телевиденийын эфирышкыже тудо кодшо ийын 28 декабрьыште лекте.
Кабельный ТВ оператор полшымо дене телевизорым ончымо годым «21-ше кнопкым» – МЭТР-ым – иктаж-могай амал дене шке телевизорыштыда огыда му гын, канал-влак шотышто настройкым уэмден ыштыза але кабельный оператор деч йодса.
МЭТР телеканалын программыже
Республикысе МЭТР телеканал передаче-влакым ямдылыме шотышто ончышо-влакын шонымашыштым шотыш налеш. 11 март гыч республикысе илыш нерген каласкалыше увер ден тематический программе-влак шукырак лийыт. Поснак кечывал передаче-шамыч ешаралтыныт, а каныш кечылаште — рушла ден марла программе-влак.
Паша кечылаште
06:00 — Увер выпуск (марла).
06:30 – «Утро на МЭТРе» (рушла).
06:50 – йоча программе (мультфильм).
07:15 – республикысе увер ден тематический программе-влак.
12:30 ден 14:30 –информационно-тематический программе (марла).
14:00 – кечывал увер (рушла).
Кастене
18:00 – марла программе-влак.
19:30 – республикысе увер-влак.
21:30 – ты кечым иктешлымашан увер-влак.
Шуматкечын
15:30 – «Марий Эл темла» тележурнал (марла).
18:30 – «Наше время» (рушла).
Рушарнян
01:30, 21:30 – «Марий Эл темла» тележурнал (угыч ончыктымаш).
01:30, 21:30 – «Наше время» (угыч ончыктымаш).