Таче Йошкар-Оласе медколледжын кок чолга студенткыже дене палымым ыштена. Елизавета Волоцкая – Марий Эл вуйлатыше А.Евстифеевын стипендиаткыже, а Анастасия Иванова А.Богаткина лӱмеш именной стипендийын сертификатшым налын.
Эн ондак Йошкар-Олаште илыше Елизавета Волоцкая медколледжыште кокымшо курсышто тунемеш, медсестра специальностьым налаш ямдылалтеш. Но ӱдыр тидын дене гына ынеж серлаге, ончыкыжым врач лийнеже. Йошкар-Оласе 15-ше номеран школым йошкар аттестат дене тунемын лектын, медицине колледжыштат лач визытан отметкылан гына шинчымашым пога. Ынде Лиза стипендиатке семын кажне тылзын 1600 теҥге ешартыш окса полышым налеш. Тидыже ончыкыжымат сайын тунемаш кумылым луктеш.
Елизаветан ешыштыже куд йоча уло, тудо – нылымше. «Мылам тунемаш, шуко пален налаш моткоч келша. Мӧҥгыштат учебникым лудам, лекцийым уэш-пачаш шергалам, ешартыш информацийым Интернетыште кычалам. Вет медициныште шуко палыман, тиде пеш ответственный паша, веет черлын илышыже, тазалыкше верч тыршыман», – мане ӱдыр.
15 ноябрьыште медицине колледжыште 16 эн сай тунемшылан именной стипендий сертификатым кучыктеныт. Нунын коклаште иктыже лач Шернур посёлкын ӱдыржӧ – Анастасия Иванова.
Вара мутланымашыш Анастасия Иванова ушныш. Тудо нылымше курсышто тунемеш, кызыт 35 еҥан группыжо учебный практикыште. «Практикыш Йошкар-Оласе чыла гаяк эмлымверышке колтат. Тушко миетат, черле-влак ӱмбакет шымлен ончалыт. Медсестра шкенжым арун кучышаш, чиемже гына огыл, тӱжвал тӱсшат чатка лийшаш. Ӱпым шала колтыман огыл, кӱчым пӱчкедыман да адакшым йошкар чия дене чиялташат ок лий. Практике годым шукылан тунемына, икымше полышым пуымо, врачын кӱштымыжым шуктымо да шке гычат черле еҥын тазалыкшым шекланен шогымо марте», – мане Анастасия.
Ӱдыр медколледжыште эртаралтше кажне мероприятийыште участвоватла, тыгак – студушемын председательже. Нуно тӱрлӧ йодышым тарватат, решатлат. «Мый ончыкшым врач лияш шонем, гематологий ден нефрологий аҥысыр специальность-влак келшат. Садлан кызыт шинчымашым, практикыште утларак уым пален налын, вузышто шке шинчымашем келгемдынем. Изинек еҥ-влаклан полшаш келшен, кочамын черланмымыж годым, воктеныже лийынам да вашке тӧрланыже манын тыршенам. Колледжыштына моткоч ушан, сай педагог-влак пашам ыштат», – ойла Настя Иванова.
Шернур вел ӱдыр мураш йӧрата, колледжын чапшым арала, рушла, марла, англичанла фонограмме почеш мура. Мер илышыште чолгалыкшым да сайын тунеммыжым шотыш налын, шукерте огыл черетан именной стипендий дене палемдалтын. Тылеч ончыч тудо стоматолог И.Андреевын именной стипендийжым налын, ынде –Республикысе эмлымверын ончысо тӱҥ врачше А.Богаткина лӱмеш. Премийын кугытшо – кажне тылзын 2000 тӱжем теҥге.
Марий Элыштына самырык-влаклан сайын тунемашышт, усталыкыштым нӧлташышт чыла йӧн уло. Ойыртемалтше, тыршыше-влакын пашаштым аклен моштат.