Туныктышо санитарке лийын ончен

«Воштылаш, товатат, сулык огыл!» мыскара конкурснан ик эн чолга участникше-влак Оршанке район Кугунур села гыч Римма Кудрявцева ден Елена Рыбакова улыт. Иктыже –  Пӧкла,  весыже – Тётю.

«Мыскара корнышко Елена Сергеевна дене коктын иктаж куд ий ончыч шогалынна. Вара мемнан деке Ирина Кудрявцева ушныш. Елена Рыбакова  дене ме эре пырля улына, кутырена, мурена, пашам ик школышто ыштена. «Кугарня» газетын эртарыме конкурсыштыжо ик гана вийнам терген ончышаш, шоналтышна. Кугу сценыште Ирина Кудрявцева дене «Каласе, доктор» сценкым икымше гана модын ончыктымо да икымше верым налме. Сценкым мый возем, илышыште  мо оҥайым шекланем, тудым модмаштына кучылтына. Репетиций годым пырля тӧрлена, уто-ситым кораҥдена, иктаж у шонымашым ешарена.  Репертуарыштына «Уныкам дек унала», «ЕГЭ», «ПАП» («Пӧръеҥым аралыме пункт»),  «Детектор лжи» да моло мыскара сценке-влак улыт», — мане Римма Алексеевна.

Параньга район Усола ялын ӱдыржӧ Крупская лӱмеш Марий Пединститутын педфакыштыже тунемын, еш пиалым Оршанке район Кугунурышто муын. Пелашыж дене коктын ик вузышто тунемыныт гынат, чон шижмашышт лач рвезын Кугунур ялыштыже почылтын. Пашам ик школышто пырля ыштеныт, кум йочам ончен куштеныт. «Сулен налме канышыш лекмекем, Йошкар-Оласе вӱргорно хирургий отделенийыште санитаркылан кум ий пашам ыштенам. Хирург деч вара кокымшо кӱлешан еҥ лийынам. Черле-влакым операцийыш каталке дене наҥгаяш полшенам, пеш шуко еҥын неле-йӧсыжым ужынам. Садлан илышыштым изиш веселаркым ышташ манын, мыскарам ойлыштам ыле. Южгунам возен толмемым лудам, воштылыт. Ынде угыч Кугунур школышко туныктышылан пашаш ӱжыныт», — мане Римма Кудрявцева.

Уста еҥ мыскарам веле огыл, мурылан ятыр мутым возен. Семмастар Елена Рыбакова дене йоча-влаклан шуко мурым келыштарат. Нуным  Кугунур«Шонанпыл» йоча фольклор ансамбль мура. Марий Эл радиошто мурыштым Н.Богданова, М.Садова, В.Мочалова да молат мурат.

Елена Рыбакова кече гай шыргыж мутланыше, поро чонан ӱдырамаш. Шукерте огыл тудо йоча-влаклан возымо  « Шулдыран муро»авторский  муро сборникым савыктен луктын. Коло муро гыч латкудытшын авторжо Римма Кудрявцева. Елена Сергеевна Йошкар-Оласе тӱвыра ден сымыктыш колледжым тунем лекмыж деч вара, 1992 ийыште Кугунур школышто пашам ышташ тӱҥалын. Тыгодымак «Шонанпыл» ансамбльын баянистше лийын. Кызытат тыштак чон кумылын тырша. Баяным шокта да мурым муралта, эше мыскараче улмыжым огеш шылте. Ушан Тётю пошкудо Пӧклам эре туныкта, садлан кок артистке шке ончышыжо-влакым шукертак муыныт.

Римма Кудрявцеван койышыжым ончен, туддеч ала-могай шокшо тул  толмым шижат.  А Елена Сергеевна шыргыжал колта гын, кавасе шем пылжат шаланен кая.