Туныктышо лийын, ынде – прапорщик

Тений кеҥежым Астрахань кундемысе Капустин Яр олаште прапорщик-влакын выпускышт лийын. Нунын коклаште – Марий Эл гыч шым еҥ. Иктыже – Дмитрий Никифоров.

Дима Курыкмарий район У Тарашныр ялыште шочын-кушкын. Индешымше класс марте Пистерлä школышто тунемын, а 10-11-ше класслаште Йоласалыште шинчымашым поген. Школ пагыт годсек Дмитрий ияш да ече дене кошташ йӧрата. Иймашын тӱрлӧ видшым тунемын. Нунын кокла гыч иктыже баттерфляй йӧн. Ийме годым ондак ик кид дене, вара – весыж дене удырен кайыман.

Школ деч вара Д.Никифоров вич ий МарГУ-што технологий да информатике туныктышо лияш ямдылалтын. Университетым тунем пытарымеке, армийыш каен. Ондак Адыгей Республикыште, а вара Абхазийыште служитлен. Мотострелковый войскаште водитель-гранатомётчик лийын.

ТУНЫКТЫШО

Армий деч вара шке школыштыжо математикым, ОБЖ-ым да черченийым туныктен. «Туныктышо лияш куштылгыжак огыл. Кажне классын ойыртемжым палыман. Уроклан чот ямдылалтман. Тунемше-влакын мӧҥгысӧ пашаштым тергыман. Тыгодым йолташ-влак денат жапым эртарыме шуэш. Икманаш, весела пагыт лийын», – шарналта Дима.

2015 ий сентябрь гыч Чебоксар олаш илаш куснен. Тушто «Ульяна» мебель фабрикыште пашам ыштен.

2016 ий мартыште Йошкар-Оласе 28-ше №-ан школыш технологийым туныктышылан пашаш пурен. Кок ий гыч контракт почеш служитлаш каяш кумылаҥын. Йошкар-Оласе десяткыште 16-шо площадкыште служитлен.

ВОЕННЫЙ УЧИЛИЩЕ

«2018 ийыште контракт почеш служитлыме годым мыланем прапорщиклан Астрахань областьысе олаш тунемаш каяш темлышт. Документым погымеке, медкомиссийым эртышым, физподготовкым сдатлышым, профотборым кучышым. Сентябрьыште тунемаш тӱҥална. Март марте казармыште иленам, вара пелашем ден ӱдырем Знаменск олаш илаш кондышым, да пачерыш илаш кусненна. Икымше курсышто тунемме годым нелырак ыле. Уэш шочмо кундемыш пӧртылаш да туныктышылан каяш шоненам, но вара тиде шонымаш мондалтын», – каласыш Д.Никифоров.

Училищыште кандаш гыч вич шагат марте тунемыныт. Военный городокыш поезд дене коштыктат. Икымше курсышто общий предмет-влак лийыныт гын, варарак профильный предметлан шукырак жап ойыралтын: инженерный графике, чертёжный графике, физподготовко, машинан ышталтмыже, машинам виктарыме да молат. Тыгак арнялан ик-кок гана нарядыш колтеныт. Тылеч посна рефератым, докладым возеныт. Пытартыш курсышто дипломым возаш жап ойыралтын. Дмитрий диплом пашажым «нылытан» отметкылан арален.

ЕШ

2016 ий августышто Курыкмарий район ӱдыр Елена Куприяновам марлан налын. Лена дене Чебоксар олаште палыме лийыныт. Нуным Диман йолташыже палымым ыштен. Кызыт Никифоровмыт ешыште кок икшыве кушкеш: Элесия да Силат. Икшыве-влаклан лӱмым курыкмарла книгаште кычалыныт. Элесия поро кумылан, ныжылге, полшаш ямде улмым ончыкта. Силат – лӱддымӧ, патыр. Элесия йочасадыш коштеш.

КАНЫШ

«Яра жап лийме годым йолташ-влак дене вӱд воктене канаш коштына. Колымат кучена. Кеҥежым Астраханьыште чот шокшо, сандене йӱштылаш миен толына. Но шыҥа да ӱвыра чот витарат. Эсогыл мӱкшым ончымо годымсо гай шляпа дене коштыт. Сандене кеҥеж пагытлан ешем дене шочмо кундемыште канена», – ойлыш Дима.

Ача-авалан шудым ышташ полшат, саскам погат.

Лишыл жапыште Д.Никифоровлан уэш службыш кайыман. Ынде Дмитрий Иваново областьыште служитлаш тӱҥалеш.

Еш альбом гыч налме фотожо.