Тулымат пурта, видеокамерымат шында

Виталий Алметев – поро кумылан, весела, полшаш эре ямде улшо рвезе. Студент жапыште МарГУ-што эртаралтше кажне мероприятийыште, футбол дене районысо турнирлаште тудым ужаш лиеш ыле. Чолгалыкше дене эре ойыртемалтын.

Виталий – Шернур район Кукнур селан шочшыжо. Кукнур кыдалаш школым тунем лектын.

Изиэм годым кусарышылан тунемаш каяш шоненам. Тунам мыланем англичан йылме чот келшен. Индешымше класс деч вара тӱняумылымаш вашталтын, да электрик лияш шонен пыштенам. 2012-2016 ийлаште МарГУ-што электроэнергетический факультетыште тунемынам. Икымше курсышто «Голос юности» да «Студенческая весна» конкурслаште участвоватленам. Тунамак спорт дене пеҥгыде кылым кученам. Факультетын, университетын да тӱшкагудын чапыштым аралаш коштынам. Нылымше курсышто тунемме годым МарГУ-н 1-ше №-ан тӱшкагудыштыжо нылымше пачашысе пурла могыржын старостыжо лийынам. Студент жап – весела пагыт. Тунамак мый шуко йолташым муынам, южышт дене тачат ужын кутырена, вашлийына.

Студент годым яра жапыште мом ыштенат?

Каныш кечылаште ялышке, ача-авалан полшаш кудалыштынам. Йолташ-влак дене футболла модынна. Мемнан селан шке командыже уло, тушко кертмем семын коштынам.

Молан лач электрик профессийым ойырен налынат?

Каласаш неле. Профессий келшен, очыни, сандене тиде корным ойырен налынам. А такшым ачамын кок изажат энергетике направлений дене пашам ыштат. Ала нуным ужын, чонем ты корныш шупшылын.

Армий илыш кузе шарналт кодын?

Дипломым налмеке, 2016 ий 2 июльышто армийыш каенам. Мый изи годсек Шочмо элем ончылно порысым шукташ шоненам. Ныл тылзе Новосибирский высший командный училищыште «учебкыште» лийынам. Тунем пытарымеке, Краснодар крайыш специальный назначениян 10-шо посна бригадысе разведывательно-десантный ротыш, логалынам. Мемнан бригадына образцово-показательныйлан шотлалтын. Армийыште ик эн кугу шонымашем шукталтын: парашют дене куд гана тӧрштенам. Икымше тӧрштымем нигунам ом мондо. Кызытат тиде сӱретым да шижмашым шарнем. Тунам шӱлышем петырналтмыла чучын, да тыгодымак чонышто куан кумыл шижалтын. Но тидлан ме шуко жап тунемынна, ямдылалтынна.

А такшым йоча пагыт годсек ВДВ але спецназ группыш логалаш шоненам. Кочамат, чӱчӱмат ВДВ войскаште лийыныт. Армий илыш радамлан тунемаш неле лийын, но жап эртыме семын чылалан тунемалтеш.

Кызыт кушто илет, мом ыштет?

Армий гыч толмеке, Озаҥ олаш илаш кусненам. Тений кеҥежым ешаҥынам. Кызыт ик фирмыште инженерлан пашам ыштем, объектлашке видеокамер-влакым шындылам. Паша дене тӱрлӧ вере командировкыш колтат. Теве шукерте огыл Моско олашке миенна ыле. Умбакыжат карьер тошкалтыш дене кӱзаш шонем.

Каныш кечылам кузе эртарет?

Каныш кечым пелашем дене эртарем. Паша кечын кастене книгам лудына, уремыште коштына. Ялыш ача-авалан полшаш коштына.