Морко посёлко покшелне верланыше памаш воктеч пӱя велыш кайыме годым тыште верланыше чатката изи пӧртым кажныже шекланен дыр. Ты пӧртыш шукыж годым тунемше-влак коштыт, Морко калыкын историйжым шымлыше-влак толедат. Такшым гын тысе омса кажнылан почмо. Меат, посёлкыш мийымына годым, чатката пӧртыш унала пурен лекде ыжна чыте. Тиде – М.Н.Янтемир лӱмеш литератур да этнографий тоштер.
Тоштер 1994 ий годсек пашам ышта. Тушто вич тӱжем утла экспонат аралалтеш. Икмыняр зал уло. Тоштер полатыш пурымеке, вигак фотовыставкыш логалат. Кызыт тыште фотограф Людмила Оразаеван ӧрыктарыше пашаже-влакым ончаш лиеш.
Шолаштыла – литератур зал. Тушто улшо материалым шке жапыштыже Марий Элын сулло журналистше, краевед Геннадий Михайлович Бекешев поген. Ты залыште Морко кундемын лӱмлӧ поэт-писательже, композиторжо, сӱретчыже, артистше-влак дене палдарат.
Пурлаште – ончер зал. Тыште кажне арверын – шке историйже, пӱрымашыже. Тыштак сӱретче-влакын пашаштым ужаш лиеш. Воктенак этнографий пӧлем. Тудым марий калыкын ожнысо илыш-йӱлаж дене кылдалтше арвер-влак сӧрастарат. А кокымшо пачашыште – Кугу Сеҥымашлан пӧлеклалтше зал.
– Ӱмаште кеҥежым ремонтым ыштыме, кӱварым ачалыме, у обойым пижыктыме, оргалитым чиялтыме да тулеч молат. Тоштерыште ме тӱрлӧ мероприятийым эртарена, калыкын кумылжым савыраш тыршена. Йоча-влак денат вашлийына. Мемнан омсана чылалан почмо, – каласыш тоштерын научный пашаеҥже В.Л. Павлова (кокымшо фотошто покшелне).
Авторын фотожо.