Тидат сеҥымаш

Звенигово оласе «Аннабель» модо театрым вуйлатыше Анна Рыбакова тений Марий Эл Республикын чапшым «Мисс Офис-2019» конкурсышто арален, полуфиналыш лектын.

Анна Звенигово олаште шочын-кушкын. Ты оласе лицейыште тунемын. Школышто тунеммыж годымак шке мастарлыкшым тӱрлӧ вере терген: художественный школышто тунемын, вокал дене заниматлен, «Лицедеи» театр студийыш да «Провинциалы» калык театрыш коштын. Мероприятийлаште чӱчкыдын вӱдышӧ лийын. Но ӱдыр эн чот кушташ йӧратен. Кызытат шуэн, но «Арт-Гранд» образцовый хореографический студийыш коштеш. Тудым Анна Витальевна ден Дмитрий Сергеевич Дёминмыт вуйлатат.

Школ деч вара А.Рыбакова МарГУ-шко Калыкле тӱвыра да тӱвыра кокласе кыл институтыш «Руководство этнокультурным центром» спецальностьым налаш «Народная художественая культура» направлений дене тунемаш пурен. Тудо изиж годсек тӱвыра пӧртым вуйлатыше лияш шонен.

Студент жапыште ончыкылык пашам нерген шуко уым да оҥайым пален налынам. Мастарлыкем тӱрлӧ творческий конкурслаште тергенам.

Бакалавриатым тунем пытарымеке, шочмо олашкем культурно-досуговый паша шотышто специалист лийын пӧртылынам. Звенигово оласе «Мечта» тӱвыра да каныме полатыш пашаш пуренам. Икмыняр жап гыч тыште «Аннабель» модо театрым почынам. Тушко вич ияш деч кугурак ӱдыр-рвезе-влак коштын кертыт. Тений мыланна ик ий темын. Тиде жапыште Россий да тӱнямбал кӱкшытан конкурслаште участвоватленна. Тыгак дизайнер-влак Алина Хорошавина ден Евгения Кошкинан коллекцийыштым шуко мероприятийыште ончыктенна. Женя дене республикыштына мотор вургемжым ончыктен коштынна, – ойлыш А.Рыбакова.

Кызыт модо театрыш мыняр еҥ коштеш? Могай ийготан нуно улыт?

Кок группына уло: кугурак ийготан-влак да изирак. Изирак ийготан группыш 5 ияш деч кугурак йоча-влак коштыт, весышкыже – 11 ийым эртыше-влак. Кажныштыже 15-20 еҥ уло.

«Мисс Офис-2019» конкурсышто участвоватлаш кӧ але мо таратен?

МарГУ-што тунеммем годымак шуко гана модо дене келшыше вургемым ончыкташ коштынам. 2018 ийыште студент-влак мыланем «Жемчужина Марий Эл» моторлык конкурсышто шке вием тергаш темленыт. Тиде конкурсыш каяш ямдылалтмына годым лач «Мисс Офис-2018» конкурсын финалже лийын. Марий Эл гыч тунам Татьяна Козуто участвоватлен. Тудо «Жемчужина Марий Эл» модельный агентствын директоржо, сандене мемнан денат пашам ыштен. Татьяна Козуто 2011 ийыште «Супермодель России» лӱмым налын. Тудын шуко чап лӱмжӧ уло. Татьяна шке койыш-шоктышыжо да примерже дене мыйымат конкурсыш каяш таратен.

Полуфиналыш логалаш манын, мом ышташ кӱлын?

Кастингым эрташ да анкетым колташ кӱлын. Анкетыште тӱрлӧ йодышлан вашмутым пуыман ыле. Тыгак фотом колташ йодыныт.

Шке мастарлыкым тергыме конкурсышто лийме – сеҥымаш!

Конкурс кузе эрта?

Конкурсышто 20-35 ияш ӱдыр-влак участвоватлен кертыт. Нуно офисыште пашам ыштышаш улыт, мутлан, бухгалтер, юрист, экономист да молат. Йодмашым январь гыч август марте колташ лиеш. Жюри член-влак колтымо анкете-влакым шымлат да ӱдыр-влакым кастингыш ӱжыт. Кастинг Москошто да икмыняр регионышто эртаралтеш. Тушто участнице-влак дене мутланат, пашашт нерген каласкалаш йодыт. Интервью деч вара икмыняр ӱдырын фотожым да анкетыжым конкурсын сайтышкыже вераҥдат. Тушто йӱклымаш эрта. Йӱклымаште эн шуко йӱкым погышо-влак финалыш лектыт.