Марий Элысе калык фронтын активистше-влак «Безопасные и качественные автомобильные дороги» нацпроект почеш 2019 ийыште Йошкар-Олаште корным ачалыше подрядчик-влакым мутым кучаш шогалташ ӱжыт.
Калык фронтын активистше-влак Йошкар-Оласе уремлаште нацпроект почеш ачалыме корно шартышлаште тӧрсырым муыныт. Общественник-влак нине корно участке-влакым ачалаш темлат.
Нацпроект почеш ӱмаште Йошкар-Олаште ныл магистральный уремыште корным ачалыме: Ленин проспектыште, Карл Маркс, Западный да Первомайский уремлаште. Ачалыме корнын чумыр кужытшо – 10,8 км. Экспертизым эртарымеке, калык фронтын активистше-влак гарантийыште улшо корно южо вере телымсе игечын тергымашыжым эртен огыл манын иктешлымашым ыштеныт.
«Карл Маркс ден Западный уремласе посна участкылаште корнын ӱмбал лончыжым ачалыман. Тыште асфальтын тӱсшӧ йомеш, шартыш пудырга. Йӱр вӱдлан йогаш лӱмын ыштыме люк воктенат асфальт лончо пудыргымо коеш. Тылеч посна разметке-влакат ӱштылалтыт. Тиде ситуацийым тӧрлаш манын кӱлешан мерым ыштыман», — каласыш Марий Элысе калык фронтын еҥже Валерий Ершов.
Общественник-влак Первомайский уремыштат экшыкым муыныт. Серов урем дене ушнымаште корно толкын гай лийын. Подрядный организаций корным асфальтный гранулят дене тӧремдаш сӧрен да сӧрымыжым шуктен огыл. Тиде уремыштак 60-шо ден 62-шо номеран пӧрт-влак коклаште лаке лийын, а тушко йӱр вӱд погына. Тидлан кӧра корно туткар лийын кертеш.