Шукын шарнат, очыни: 2000-ше ийла тӱҥалтыште йоча-влаклан «Шонанпыл» телепередачым кугу шинчан, курчакла койшо мотор ӱдыр Женя Логинова вӱден. Тидлан ынде ятыр ий эртен, ӱдыр кушкын шогалын, тений марлан каен. Ынде тудо Яранцева фамилиян лийын. Евгения – спортивный туризм дене спорт мастер, тӱрлӧ кӱкшытан таҥасымашлаште чӱчкыдын сеҥышыш лектеш.
– Женя, спортивный туризмыш кузе логалынат?
– Изинек кушташ йӧратенам, куштымаш кружоклашкат коштынам. Но Йошкар-Оласе кокымшо номеран школышто кудымшо классыште тунеммем годым мемнам, икмыняр ӱдыр-рвезым, «Школа безопасности» конкурсышко участвоватлаш наҥгаеныт. Тушто мый икымше гана спортын тыгай видше улмо нерген пален налынам. Мыланна тудо моткоч келшен да йолташем-влак дене пырля 29-ше номеран школ пеленсе «Азимут» спорт клубыш тренировкыш кошташ тӱҥалынна. Варажым тренировкыш пырля кошташ тӱҥалше ӱдыр-рвезе-влак кокла гыч шкетын гына кодым.
— Школ деч вара илышетым спорт дене кылденат?
– Школым шӧртьньӧ медаль дене пытаренам да Волгатехын экономический факультетышкыже тунемаш пуренам. Ныл ий бакалавриатыште шинчымашым погенам, кок ий – магистратурышто. Магистратурым йошкар диплом дене тунем пытаренам. Студент пагытыште спорт дене пеҥгыде кылым кученам, спортивный стипендийым налынам.
– Спорт мастер марте кушкаш ятыр тыршаш логалын?
– Эн ондак оласе старт-влак лийыныт. Тыште икымше разряд марте кушкаш лиеш. Варажым – республикысе таҥасымаш-влак. Тушто спорт мастерыш кандидат да спорт мастер лӱмым налаш лиеш. Чыла нине этап-влакым мый эртенам.
– Таҥасымашлашке чӱчкыдын коштат?
– Командына Российын сборныйышкыжо пура. Тыгак мый Марий Элын спорт туризмжын командыштыже улам. Кажне ийын – кеҥежым да телым –Российысе чемпионатлаш кудалыштына. Мемнан спортын видышкыже тӱрлӧ этапым эртымаш, корем гоч сакыме кандыра дене вончымаш, пушеҥгыш кӱзымаш да тулеч молат пурат.
Тений Белгород олаш миенна. Мыланна пеш келшен. Общекомандный зачётышто икымше верыште лийынна. Тиде ӱчашымашыште икымше гана ик кечынак кок тӱрлӧ дистанций лийын: маркироватлыдыме кужу дистанций да кӱчык дистанций. Кок вережат ме икымше верыш лектынна.
Тыгай таҥасымаш-влак личный дистанцийыште, связкыште да командныйыште эртат. Личныйыште спортсмен шкетын куржеш, связкыште – коктын да командныйыште – ныл еҥ. Кызыт ӱдырамаш да пӧръеҥ команде-влак улыт. А ондакше командыште кум рвезе да ик ӱдыр лийыныт.
Каласыман: спортын тиде видше дене республикыштына спорт мастер-влак шукын улыт. Мемнан командына Российыште ик эн виянлан шотлалтеш.
– Магистратурым тунем пытарымек, диплом почеш пашам ыштет?
– Кызыт ик кугу фирмыште аналитик улам. Тудын Йошкар-Олаште филиалже эше уке, Чебоксар олаште гына, сандене мӧҥгыштӧ дистанционно пашам ыштем.
– Женя, олаште шочын-кушкынат гынат, марла моткоч сайын, чаткан кутырет. Марий йылмылан тыйым кӧ кумылаҥден?
– Ешыштем мый денем эре марла кутыреныт. Изирак улмем годым троллейбусышто ик ӱдырамаш марла ойлымем колынат, авамым шылталаш тӱҥалын, йочам молан марла кутыраш туныктеда манын йодын. Тау авамлан. Тудо тунам йӧршеш вес семын шонен. Морко район Кокласолаште илыше ковамат шочмо йылмылан шӱмаҥден. Ынде ешан улам гынат, ковам деке унала чӱчкыдын миен кошташ тыршем.