Кажне пöръеҥ армийыште служитлыме пагытым ӱмыреш шарнен ила. Тыште капкыл пеҥгыдемеш, койыш-шоктыш вашталтеш, тӱняончалтыш кумдаҥеш. Икте армий деч вара шочмо кундемышкыже пöртылеш гын, весе контракт почеш тушанак кодеш. Шомакна Татарстан Республик Арск районысо Шорамучаш ялыште шочын-кушшо рвезе Артём Михайлов нерген лиеш. Тудо Мурманск область Североморск олаште 15 ий утла служитла.
Артем отпуск жапыште 250 утла суртан шочмо ялышкыже кажне гана куанен толеш. уло. Артем Михайлов вич шочшан ешыште шочын-кушкын. Ача-аваже ты кундемысе «ТАН» колхозышто пашам ыштеныт. Ачаже трактористлан, механизаторлан, апшатлан ыштен, аваже доярке лийын. Шочмо суртыштыжо Артёмым ачаже шӱм пырткен вуча. Кодшо ийын эн лишыл еҥже, аваже, ош тӱня дене чеверласен.
Артём, Шорамучаш школым тунемын пытарымеке, Озаҥ оласе 123-шо номеран профессиональный лицейыште тунемын.
«Мемнан ял гыч шуко палымем, тыгак тукым изам-влак ты лицейыште тунемыныт. Тушко мыйымат ӱжыч. Тӱшкагудышто илаш пöлемым пуат, паша верымат ойырат. 2002 ийыште ты лицейышке летательный аппаратым ыштыше слесарь специальностьлан тунемаш пурышым. Дипломым налмеке, Озаҥ оласе Горбунов лӱмеш авиационный заводышто пашам ышташ тӱҥальым. Тушто ТУ -214 гражданский самолетым ыштат ыле. Мый кудымшо цехыште самолетын шулдыржым погенам. Ныл тылзе ыштен шуктышым, армийыш каяш повестке тольо», — ойла Артём.
Тыге 19 ияш рвезе 2004 ий ноябрьыште салтак радамыш ушна. Тудым теҥыз флотышко колтеныт.
«Службо сайын эртен. «Бесстрашный» кугу корабль дене коштынна. Вара тудлан «Адмирал Ушаков» лӱмым пуэныт. Мый визымше электромеханический военный частьышке логалынам. Учений годым теҥызышке лектына ыле. Тора боевой походышко 2005 ийыште Антлантический океанышке тылзат пелылан лекме. Тиде жап эн чот ушеш кодын. Тунам икымше гана теҥызым, океаным ужынам. Йырымваш ончалат –эре вӱд. Якорьышто шогымо годым колым кучена ыле. Южышт вӱд ӱмбалне лийын огыт керт, а мый тидлан вашке тунемынам», — ойла рвезе.
А.Михайлов идалыкат пеле служитлыме деч вара умбакыжымат тышанак кодаш шонен пышта. Тыге 2006 ий шошым икымше контрактым подписатла да кеҥеж пагытлан отпускышко шочмо кундемышкыже ача-аваж деке толеш. Тиддеч вара пӱтынек шке илышыжым военный корно дене кылда. Кызыт нылымше контракт почеш служитла.
«Служитлаш келша. Мыланем служебный пачерым пуышт. Пачер – паша вер воктенак. Контрактым подписатлыме деч вара ответственность утларак шижалте. Корабльыште кугу куатан токым пуымо пöлка вуйлатыше улам. Званием – старшина.
Корабльна куд-шым пачашан пöрт гай кугу. Чылаже тушко 340 еҥ шыҥа. Кужытшо 156,5 метр, лопкытшо – 17,2 метр. Группышто 27 еҥ уло. Баренц теҥызышке тылзылан але ик-кок арнялан, южгунам кок шагатлан корабль дене лектына.
Учений годым постышто шинчем, тыглай кече годым группышто дежуритлем. Телым причалыште лумым эрыктена, кеҥежым арулыкым эскерена. Мемнан дене ӱдыр-влак уке улыт, сандене чыла пашам рвезе-влаклан ышташ логалеш. Икмыняр еҥлан пареҥгым эрыкташ, весылан кӱмыж-совлам мушкаш да тулеч моло вес паша-влакым ышташ шеледен пуэна. Салтак-влак веле огыл, контракт почеш служитлыше-влакат тыгай пашам шуктат.
Кажне ийын Кольский заливыште 9 Майым, ВМФ кечым пайремлыме лӱмеш парадыш лектына. Служитлаш неле огыл. Тыште ятыр самырык еҥ уло, но южышт тÿрлö амаллан кöра службым кудалтен каят», — каласкала Артем Михайлов.
Артем Михайлов Североморск олаште шке пӱрымашыжым, марий ӱдырым, вашлийын. Кужэҥер вел гыч Ольга ты олаште илыше акаж деке уналан толын улмаш. Руш-влак коклаште илыше рвезылан марий ӱдыр вигак шинчашкыже пернен. Кызыт нунын кум шочшышт ача-авам куандарат. Владислав эргышт тений 3-шо классышке вончен. Ныл ияш Милена йочасадышке коштеш. А Платон тений февральыште гына шочын. Артёмлан еш – мучашдыме куан, пиал. Тудо эр гыч кас марте службышто тырша, пелашыже йоча-влакым онча.
33 ияш пöръеҥ шке пашажым кӱлынак шукта. Латвич ий служитлыме пагытыште тудо шукылан тунем шуктен. Ты пашам сайын пала. А ешыже тудлан эн кугу эҥертыш семын ончыко каяш куатым пуа. Марий рвезе пашаште шке мастарлыкшым ий еда нöлтен толеш.