1-10 апрельыште республикыште самырык-влак коклаште Тазалык арня эртаралтеш.
Ты жапыште образовательный, тазалыкым аралыме да социально аралыме организацийлаште, пашаче коллективлаште таза илыш-йӱлам кучаш таратыше мероприятий-влак эртаралтыт. Эн оҥайже — шуко еҥан флешмоб — зарядке. Тудо таче 9 шагат гыч 10 шагат, 13 шагат гыч 14 шагат марте лиеш. Мероприятий «Строитель» спортклубын да «Пульс» творческий пространствын зарядке видеозаписьышт почеш эртаралтеш. Участник-влак шке видеоматериалыштым соцсетьлаш #здоровьетайм хештег дене вераҥдат.
Морко кундемын шочшыжо-влак военнослужащий-контрактник Леонид Смирнов ден Валентина пелашыже (И.С.Палантай лӱмеш тӱвыра да сымыктыш колледжын программистше) таза илыш-йӱлам кучат. Капкылыштым пеҥгыдемдаш манын, тӱрлӧ физупражненийым ыштылыт, куржталыт, олаште шукыж годым йолын коштыт. Нуным «Арена» спорт комплексыште чӱчкыдын ужаш лиеш. Тыште капкылым пеҥгыдемдаш полшышо тӱрлӧ спортивный снаряд-влак улыт, кужытыш да кӱкшытыш тӧрштылаш плошадке-влак, куржталме корно шкешт деке шупшыт. Леонид ден Валентина шке шочшыштым: куд ияш Илья ден кок ияш Йываным – изинекак физкультурлан шӱмаҥдат.
Иван Речкин.
Авторын фотожо.