Уремысе сӱретче-шамыч Йошкар-Олаште илыше еҥ-влаклан пӧлекым ыштат. Нуно оласе пӧрт пырдыжлам сӧрастараш тӱҥалыт. Икмыняр жап гыч сӱретлаште ме врач, шанчыеҥ, волонтёр-влакым ужын кертына.
Тыгай акций Российыште эртаралтеш. Тӱняште шучко инфекций шарлымылан кӧра врач, волонтёр, соцпашаеҥ-влаклан моткоч шуко тыршашышт логалеш. Сандене, нунылан таушташ манын, самырык еҥ-влак пырдыжлам сӧрастараш тӱҥалыт.
Кодшо кечылаште рӱдоласе Эшкинин уремыште верланыше подстанцийын пырдыжешыже самырык сӱретче-влак Олег Мясников ден Илья Белов ик сӱретым ямдылен шуктеныт.
Рвезе-влак пытартыш жапыште коктын сӱретлат. «Тыге паша вашкерак кая», – маныт нуно. Адакшым иктыже огеш ярсе гын, весыже полшаш эре ямде. Уремысе сӱретлымаш нерген ме Олег Мясников дене мутланышна.
– Олег, шке нергенет палдаре. Кушто шочынат да тунемынат?
– Мый Йошкар-Олаште шочын-кушкынам. Икымше номеран кыдалаш школым тунем пытарымеке, умбакыже Марий кугыжаныш университетын педагогике да психологий факультетыштыже шинчымашым погенам.
– Кунам сӱретлаш тӱҥалынат?
– Сӱретлаш изинек йӧратенам. Но тидлан мый нигуштат лӱмын тунемын омыл. Кугурак-влак деч чӱчкыдын колынам: «Тый сайын сӱретлет, тиде пашам кудалтыман огыл, умбакыжат шуарыман».
– Граффити направленийым ойыраш тыйым мо таратен?
– Мыланем граффити направлений ондакат келшен. Вес эллаште тудын вияҥ толмыжым, весе-влакын мом да кузе сӱретлымыштым эреак эскеренам. 2013 ийыште Сеҥымаш кече вашеш кидышкем чиян баллончикым налын, Йошкар-Оласе 28-ше номеран школ воктенысе пырдыжыш йӱдым йыштак икымше сӱретем сӱретленам. Тунам мый тудым Кугу Сеҥымаш вашеш ыштенам, сандене еҥ-влакын кумылыштым нӧлталаш шоненам.Сӱретыште Берлиным сеҥен налме татым ончыктенам.
Тулеч вара тиде направлений дене шуко пашам ышташ тӱҥалынам. Мый раш паленам: сӱрет-влак айда-лийже лийшаш огытыл. Пашам-влак еҥ-шамычым шонкалаш таратышт, кумылыштым нӧлтышт манын шоненам.
– Сӱрет – тиде паша але хобби?
– Мыланем – хобби. Кеч чӱчкыдын йодмо почеш сӱретлем. Ондак могай пашам темлат, чыла ышташ тыршенна. Кызыт кугурак заказым веле налына, тудым ышташ жап ситышын лийшаш. Вет сӱретлыме деч посна кажнынан вес паша уло. Сӱретлена шуко, пытартыш жапыште тӱрлӧ компьютер модышла гыч персонаж-влакым ышташ логалеш.
– Уремласе пырдыжлаште чия дене возымо але сӱретлыме чӱчкыдын вашлиялтеш. Тыгодым оралтын тӱжвал тӱсшым тиде огеш сымыстаре. Тидын шотышто мом шонет?
– Еҥ-влак шукыж годым огыт умыло, могай шонымаш пырдыжласе возымаште шылын. Тиде толкынышто улшо-влак гына умылат.
Самырык-влак шке мастарлыкыштым ончыктынешт, сандене уремысе пырдыжлаште возкалат. Кугу олалаште тидлан лӱмын ойырымо вер уло. Тушто нуно кеч-могай жапыште сӱретлен кертыт. Уремысе пырдыжлаште сӱретче-влак эре лийыт, тидын деч ме кораҥын огына керт, вет тиде – граффити. Мемнан денат тыгай вер-влакым шукырак ойырат ыле гын, самырык-влакын мастарлыкыштым ончыкташ йӧн шукырак лиеш ыле.