Могай ныжылгын марла шокта Татьяна лӱм. 25 январьыште Российыште Студент-влак да Тачана-шамыч шке кечыштым пайремлат. Шнуй Татьяна эсогыл студент-влакын аралтышыштлан шотлалтеш. Морко район Весшӱргӧ ялысе ӱдыр Татьяна Ивановалан тиде кече кок пачаш пайрем.
Таня МарГУ-со Калыкле тӱвыра да тӱвыра кокласе кыл институтышто нылымше курсышто тунемеш. Творчествылан шӱман. «Кок классым Весшӱргӧ школышто тунемынам, варажым – Волаксола кыдалаш школышто. Школна Йошкар-Оласе строительный техникум дене договорым ыштен. Тудын почеш 10-11-ше классна профильный лийын. Занятий-влакым техникумын педагогшо-влак эртареныт. Кок ий тунеммеке, кумшо курсым заочно техникумышто тунем пытаренам, юрист профессийым налынам. А ӱмаште «Управление персоналом» программе почеш профессиональный ямдылалтме курсыш тунемаш пуренам, — мут мундыражым рончаш тӱҥале студентке. — Марла мураш да кушташ йӧратем. Йоча годым шӱжарем-влак дене пырля коча-кова-шамычлан изирак концертым ончыктена ыле. Весшӱргӧ ялысе клубыш кушташ коштынам. Тушто хореограф Наталья Геннадьевна Малинина, варажым Елена Алексеевна Александрова мыйым да моло ӱдыр-рвезе-влакым шукылан туныктеныт. Музык, марий сем чонем рӱпшат. Кызыт гитар дене шокташ тунемам».
Т.Иванова икымше курс гычак «Марий мурсем» ансамбльыш коштеш. «Сентябрьыште ик мотор кечын ансамбльым вуйлатыше Родион Сергеевич Алексеев мемнан курсысо студент-влак дене вашлийын да «Марий мурсем» нерген каласкален. Тушко кошташ кумылем лектын. Ансамбль дене пырля тӱрлӧ кундемышке, республикысе чыла манме гаяк районлашке миен коштынам. Шуко куштымашлан тунемынам. Творчестве деч посна мыйым шанче паша сымыстара. Тӱрлӧ научный конференцийыш статья-влакым возем. Тидын шотышто мылам филологий шанче кандидат, доцент Людмила Ивановна Барцева каҥаш дене полша», — манеш ӱдыр.
«Оҥай палаш, кӧ тылат тыгай лӱмым пуэн? Могай койыш-шоктыш дене Тачана-влак ойыртемалтыт?» — йодым Таня деч. Тудо вашештыш: «Авамын еҥгаже Татьяна да ачамын чӱчӱжӧ авам ден ачамым палымым ыштеныт. Нуно келшаш тӱҥалыныт, а варажым сӱан лийын. Шочмекем, мылам, шуко шоныде, еҥгам лӱмеш Татьяна лӱмым пуэныт. Таня-влак усталык шӱлышан, яндар чонан, вашке шокшешт кайыше улыт. Нунын кумылышт писын вашталт кертеш. Мылам шке лӱмем моткоч келша».
Теве тудо, марий ӱдыр Тачана. Университет деч вара кушко кайымыжым эше ок пале. Мардеж сай векыла лупшалеш манын ӱшана.