Медведево район Кыдал Озакъялыште тӱрлӧ пашам ворандараш «Озакъял Мари» ТОС (территориальный общественный самоуправлений) ышталтын. Икмыняр ий ончыч тудын активистше-влак самырык-шамычлан хоккей площадкым чоҥен шындышт. Тидым нуно «Местные инициативы» программе почеш шуктеныт. Тений ты программе денак Кыдал Озакъялыште Кугу Отечественный сарыште вуйым пыштыше-влаклан памятникым тичмашнек уэмдаш шонат. Тиде верым «Шарнымаш аллейыш» савыраш проектым нуно калык дене пырля возеныт.
Кажне ийын Сеҥымаш пайрем годым ты памятник йыр изижат-кугужат погынат. Воктекыже миен, еҥ-влак пеледышым пыштат, Шочмо эл верч кредалше-влакым шарналтат. 2004 ийыште ыштыме памятник тоштемын. «Озакъял Мари» мер организацийын активистше-влак Кугу Отечественный да тӱрлӧ жапысе сарлаште, военный конфликтлаште лийше да колышо еҥ-влакын лӱмыштым возыман стелым шогалташ кӱлешанлан шотленыт. Самырык тукым сарын участникше-шамычым гына огыл, тыгак шочмо кундем деч ӧрдыжтӧ порысым шуктышо землякыштын подвигыштым палышаш.
«Аллея памяти» проект почеш памятник йыр тротуарлык плиткым оптынешт, ялысе еҥ-влак тышан шинчын каналтен кертышт манын, теҥгылым, шӱкым кышкаш урным келыштарынешт. Ты аллей йыр пушеҥге ден вондерым шындат, пеледышлан клумбым йӧнештарат. Тыштак выставочный стенд лиеш. Тушто тысе ял шотан илемын илышыже ончыкталтеш, мероприятий да пайрем нерген возалтеш.
Тыге шарныктыш воктеке калык толаш тӱҥалеш, да Родинын тӱвыра да исторический поянлыкше дене палдарыше вер аралалтеш, уэмеш. А тӱҥжӧ — Озакъял кундем тӱзлана.