Ӱмаште декабрь мучаште республикысе изосымыктыш тоштерыште Йошкар-Оласе художественный училищын «Живопись» отделенийыштыже 4-ше курсышто тунемше студент-влакын «Мы» выставкышт почылтын. Нунын кураторышт – самырык туныктышо да сӱретче Анна Санникова. Ты ончерым чумыраш лачак тудын шонымашыже улмаш.
Выставкыште эн оҥайже – группын фотож дене картиным ыштыме. Кажне студент иктаж йолташыжым сӱретлен. Картине моткоч сайын коеш, самырык-влакым эре шымлен ончымо вел шуэш.
Ты ончерыште Юлиан Агачевын эн шуко (20 утла) пашажым ончыктымо. Тушто студентын бумажный уголь, ӱян чия (художественный масло) дене сӱретлыме радынаже-влакым ужына.
Арам огыл Ю.Агачевын картиныже-влаклан кумдарак верым ойыреныт. Тудо 2017 ийыште Б.Урманчен шочмыжлан 120 ий теммылан пӧлеклалтше йоча да самырык-влаклан творческий конкурсышто (Татарстаныште эртаралтын)17-23 ияш-влак коклаште «Живопись» номинацийыште III верым налын. Чебоксарысе художественный училищым негызлыше Ф.С.Быковлан пӧлеклалтше VIII межрегиональный творческий конкурсышто «Графика» номинацийыште икымше верым сулен. Тыгак кодшо ийын «Молодые таланты Республики Марий Эл» конкурсышто «Изобразительный искусство» номинацийыште I степенян лауреат лийын.
«Мемнан туныктышына Анна Андреевна живописьым, рисункым да композицийым туныкта. Тудо кок ий ончыч «Таврида» форумышто грантым сеҥен налын. Ты педагогын проект пашаже почеш ме виртуальный реальность клубышко коштынна. Тушто у семын сӱретлаш тунемынна, чия да кистычке деч посна шке пашанам тул, йӱлышӧ да вашталтше чия, шӱдыр дене сӧрастаренна. Сӱретлен ончышым да чонемлан келшыш. Тиде йӧн дене «Портал-2» компьютер модыш гыч ужаш-влакым сӱретленам. Кызытат ты йӧным кучылтам», – ойла Юлиан.
Ю.Агачев Марий Турек район Китньымучаш ялыште шочын. Изиж годым иктаж-могай картиным ончен сӱретлаш йӧратен. Аваже тидым ужын да 5-ше классыште тудым Марий Турекысе художественный школыш пуэн. Тушто рвезылан сӱрет тӱням, тӱрлӧ техникым Надежда Васильевна Роженцова умылтарен. Туныктышыжо Юлианын пашажым тӱрлӧ конкурслашке колтеден. Сеҥымашыжат ятыр лийын. Теве 2011 ийыште «Все краски мира» йоча изосымыктыш тӱнямбал фестивальын «Попутный ветер» конкурсыштыжо кокымшо верым налын.
Художественный школым «визытанлан» тунем лектын, 11-ше класс деч вара Йошкар-Оласе художественный училищыш тунемаш пурен. Тыште тунемше-влакын яра жапышт моткоч шагал. Шым-кандаш шагат кас марте тунемме верыште лийыт да сӱретлаш тунемыт. Кызыт Юлиан чыла жапшым да моштымашыжым лач тунемаш ойыра. Илен-толын, кугу изосымыктыш тӱняште шуко ойыртемалтше радынам шочыкташ шона.