Татьяна Шакирова И.С.Палантай лӱмеш тӱвыра да сымыктыш колледжын сольно-хоровой да калык мурымаш отделенийыштыже тунемеш. Ӱдыр моткоч чулым да чолга. Мастарлыкше дене конкурслаште ойыртемалтеш. 2019 ийыште регион-влак кокласе «Ший памаш» муро конкурс-фестивальыште III степенян лауреат лӱмым сулен.
Ӱдыр Башкортостан Республикысе Нефтекамск олаште шочын, вара ешыж дене Краснокам район Корий селашке илаш куснен. Икымше классышке Таня тысе школышкак каен. Кудымшо классыште тунеммыж годым Нефтекамск оласе музыкальный школышко сольно-хоровой да калык муро направлений дене тунемаш пурен. Арняште кум гана ӱдыр 10 меҥге тораш кудалыштын. Кыдалаш школышто индешымше классым да музыкальный школышто вич классым тунем пытарымеке, тудо Йошкар-Олашке тӱвыра да сымыктыш колледжыш тунемаш пура.
«Кыдалаш школышто индешымше классыште тунеммем годым, музыкальный школышто тичмаш образованийым налаш манын, ик ийыште кок курсым тунемым да йошкар дипломым нальым. Вара йодыш лекте: умбакыже кушко тунемаш каяш? Такше мый Уфа олашке тунемаш пуренам ыле, но Йошкар-Олам ойырен нальым. Йошкар-Ола мылам моткоч келшен, тыште еҥ-влак поро улыт. Кызыт кумшо курсышто тунемам», – каласкалаш тӱҥале ӱдыр.
Таня – чолга ӱдыр, тунемаш толмекыже, икымше кечыла гычак ойыртемалтын. Тылзат эртен огыл, тудо шке сольный мурыж дене колледжысе сценыште мастарлыкшым ончыктен. «Мурымем туныктышо да студент-влак колыныт, сайлан шотленыт. Варажым тиде муро денак колледжыште эртаралтше чыла гаяк мероприятийлашке ӱжаш тӱҥалыныт. Колледжыште тунемме жапыште мый тӱрлӧ конкурслаште участвоватленам, Москвашкат миенам. 2019 ийыште регион-влак кокласе «Ший памаш» муро конкурс-фестивальыште III степенян лауреат лийынам. Ӱмаште колледжыште эртарыме «Студент года» конкурсышто кумшо верым налынам. Яра жапем уло гын, тӱвыра да мер паша отделенийыште тунемше ӱдыр-рвезе-влаклан тӱрлӧ мероприятийым эртараш полшем. Тунемме деч вара мый автошколыш тунемаш коштам, теве шукерте огыл гына тушто экзаменым сайын сдатленам», – умбакыже каласкала Татьяна.
Студент кече самырык ӱдырлан – кок пачаш пайрем. Тудым кузе пайремлет йодмемлан, тыгерак вашештыш: «Мый Татьянан кечыжым гына палемдем. Кок ий ончыч тынеш пуренам, садлан ты пайрем мылам эшеат лишылла чучеш. Тиде кечын мый тортым налам да йолташем-влакым ӱжам».
Колледж деч вара, Татьянан умбакыжат тунемаш каяш шонымашыже уло: «Мый марий ӱдыр улам, но татар ден башкир-влак дене пырля ваш келшен илымылан кӧра нунын тӱвырашт мылам лишыл. Йылмыштым умылем, репертуарыштем марий ден руш муро гына огыл, тыгак татар муро-влакат улыт. Сандене умбакыже Озаҥ олаш тунемаш каяш шонем. Марий сем направлений дене умбакыже тунемам гын, Йошкар-Олашке мурым возаш але выступатлаш толаш тӱҥалам. Кызытеш мыйын ик марий муро гына уло, «Шинчавӱд поран» маналтеш. Умбакыжат марий автор-влак дене пашам ышташ шонем».
Татьянам ме Тачанан кечыже да Стедент-влакын кечышт дене саламлена. Тек тудо эре тыгаяк чолга да чулым лиеш, творческий шӱлышыжӧ нигунам ынже йом.