Сочиштат, Марий Элыштат ончыктат

13-18 июльышто Э.Сапаев лӱмеш академический опер да балет театрын балет труппыжо гастроль дене Сочи олаште «Лебединое озеро», «Щелкунчик», «Золушка» спектакль-влакым ончыктен.

Кеҥеж тургым театр гастрольлан поян. 24 августышто Юрино районысо Шереметев замкыште «Эсмеральда» балетым ончыктена. А Йошкар-Олан шочмо кечыжлан пӧлеклалтше пайремыште театральный марафонышто республикысе чыла театр-влак выступатлаш тӱҥалыт. — манеш Марий Элын тӱвыра, печать да калык-влакын пашашт шотышто министр К.Иванов. 6 июльышто, «Театральное Приволжье» фестиваль жапыште, Килемар районысо Арде кундемыште («Раздолье» каныме верыште) «Акпатыр» оперым ончыктенна. Театр сцене гыч пӱртӱс лоҥгашке лекмаш калыкланат, артист-шамычланат моткоч келша, сандене йӱран ночкырак игечат тидлан чаракым ок ыште. Тиде верыште кокымшо гана тыгай постановко лийын. Ончыкыжым тыгай пайремым кажне ийын тыште эртараш тӱҥалына. Вес ийын постановкына республикын 100 ий теммылан \пӧлеклалтеш.

Тыгайым ужаш чынжымак куанле. Чылажат кава йымалне, пӱртӱс лоҥгаште ончыкталтеш, театрысе гай огыл. Артист-влакланат, ончышо-влакланат эрык пуалтын, пуйто чылажат шинча ончылнак, чын илыш семын эрта. Сцене олмеш олык аланым ойырымо, шеҥгелне мотор эҥер вӱд декорацийым нимо деч сылнын сӧрастара. Да тиде веле мо?! Артист-влак спектакль жапыштак пуш дене ийын толыт, йырымваш тул олмо рӱмбалгаш тӱҥалше касым волгалтара да мемнам Емельян Пугачевын восстанийже годсо жапыш пӧртылта. Вет тиде икымше марий оперыште лач тудо жапым сӱретлыме, марий талешке Акпатырын вийжым, йӧратымашыжым, калык верч шогымыжым ончыктымо.

Республикысе театр-влак денат, артист-влак денат кугешнаш гына кодеш.

Э.ИМАНАЕВ.