Киров кундем Малмыж район Кугу Кетек тӱвыра пӧрт пелен кугыеҥ-влакын «Кетек вел» да йоча-влакын «Шӱдыр» ден «Шонанпыл» ансамбльышт уло. Кодшо кечылаште нунын вуйлатышышт Ирина Кошкина дене палыме лийым. Тудо «Шӱдыр» йоча ансамбльым Морко район Унчо селасе пайремышке конден ыле. Ӱдыр-рвезе-влак Марий кундемыш икымше гана толмыштлан моткоч куаненыт.
Ирина кодшо ийын И.С.Палантай лӱмеш тӱвыра да сымыктыш колледжым «Социально-культурная деятельность» специальность дене тунем пытарен.
«Кугу Кетек школышто тунемме годым марла муренам. Тунам школыштына марий йылмым Аркадий Кузьмич Анисимов туныктен, марий тӱвыралан кумылаҥден шоген. Индешымше класс деч вара Йошкар-Олашке тольым, Палантай лӱмеш тӱвыра да сымыктыш колледжышке тунемаш пурышым. Тудым тунем лектын, шочмо кундемышкак пӧртыльым», – каласкалыш Ирина Анатольевна.
«Шӱдыр» ансамбльым 2013 ийыште чумырымо. Тушко Кугу Кетек школысо 9-11 класслаште тунемше-влак коштыт. Ты коллектив Киров областьыште эртаралтше «Вешние воды» конкурсышто икымше верым налын. «Созвездие талантов» всероссийский конкурсышто ик гана веле огыл сеҥыше радамышке лектын.
Такшым Ирина Кошкина йочаж годсек марий калык куштымашым йӧрата, мурымашке, куштымашке уло кумылын ушнен. Тунамак ӱдыр куштызо але мурызо лияш шонен. Ончыч ешыж дене Кирово-Чепецк олаште илен, автовокзалыште кассирлан пашам ыштен. Ача лийшыжым ончаш кӱлмылан кӧра 2009 ийыште ялышке илаш куснен. Жап эртен гынат, тӱвыра да сымыктыш колледжыш пурен да тудым тунем пытарен. Кызыт тидлан моткоч куана. Эсогыл йоча-влакым кушташ туныктымо пашаже самырык специалистлан куаным конда. Кевытлаште книгам налеш, интернетыште куштымаш-влакым шергал лектеш, моло ансамбльын куштымашыже-влакым эскера да «Шӱдыр» ансамбльыш коштшо йоча-шамычлан хореограф семын куштымо шында. Ирина Анатольевна «Марий Эл» кугыжаныш ансамбльын пашажым поснак чот тӱткын эскера, ты коллективым примерлан шында. Сандене тунемшыже-влаклан южо куштымашыште движенийыштым профессионал-влак семынак
ышташ темла. Тыгеак икмыняр выступлений шочын.
«Шӱдыр» ансамбльжым кӧ шочыктен?» – йодым И.Кошкина деч.
«Ӱдыр ден рвезе-шамыч клубышко коштыныт, шке коклаштышт ала-могай куштымашым шынденыт. Вара мый нуным чумырен, икмыняр куштымашым ыштышым. Тыге изирак концертым ямдылышна. Лачак тыгай выступленийна 2014 ийыште «Акпатыр» пайремыште лие», –вашештыш Ирина.
Кызыт «Шӱдыр» ансамбльын репертуарыштыже тӱрлӧ калык-влакын койышыштым ончыктышо куштымаш-влак улыт. Ӱдыр-рвезе-шамыч марий калыкын тӱрлӧ куштымашыжым веле огыл тунемыт, татар, руш, удмурт куштымаш-шамычым сайын палат.
И.Кошкина – вич шочшан ава. Чылан манме гаяк аважын вуйлатыме коллективыште улыт. Теве Карина, Ярослав, Ангелина «Шӱдыр» ансамбльыш коштыт, а ныл ияш Инесса «Шонанпыл» коллективыште южгунам кушталта. Лач Савелий кызытеш ты сомыллан шӱмаҥын огыл. Туге гынат марий тувырым чиен, тӱрлӧ мероприятийыште тавалта.
Икманаш, Кугу Кетек селаште марла кушталташ изинек тунемыт. Шӱм-чон йодмо пашам Ирина Анатольевна уло кумылын шукта. Виче велысе кызытсе нӧргӧ тукымын марий тӱвырам пален кушмыжлан йывырташ веле кодеш.
Эльвира Терентьева.