Диана Ямбаршевам муро аланыште шагалын палат гынат, тудын мурыжым Марий Эл радион эфирыштыже кажне кечын гаяк колтат. Кызытеш ныл мурыжо уло, кажныже — сылне да кумылым нӧлтышӧ. Йӱкшӧ яндар, профессионально мура.
Самырык ава Советский поселкышто ила да верысе тӱвыра полатыште йоча-влак дене пашам ыштыме секторым, тыгак «Эркече» вокал ансамбль ден «Мурызо тукым» фольклор коллективым вуйлата.
Вечын селан ӱдыржӧ И.Палантай лӱмеш тӱвыра да сымыктыш коллдежыште «Этнохудожественное творчество» специальность дене шинчымашым налмек, 2013 ийыште шочмо кундемышкыже толын. Теве ынде куд ий шке моштымашыжым сылнылык тӱнялан пӧлекла.
«Изинек мураш йӧратенам, йочасадыш коштмем годым посна мурыктат ыле. Вара музык кружокыш пуэныт. Мыйым тушто Тамара Александровна Шабалина мураш туныктен, ончыкылык корнемым ойыраш полшен. Школышто тунеммем годым хорышто муренам, концертыште усталыкем ончыктенам. Районысо конкурслаште мурен-куштымемым кызытат кумылын шарналтем. Ачам-авамын ик ӱдырышт гына улам, тӱвыра дене илышем кылдаш шонымелан тореш лийын огытыл», — мане Диана.
Теният Пеледыш пайрем кечын кастене Ленин площадьыште эстраде шӱдыр-влак кугу концертым ончыктеныт. Тушто Диана Ямбаршева икымше гана выступатлен да иканаште шуко еҥ ончылно лӱмжӧ гын огыл, шкежат «чӱкталтын». Тудын репертуарыштыже тачылан самодеятельный автор Александр Мамаевын мурыжо-влак улыт. Туддене Диана эше колледжыште тунеммыж годымак палыме лийын. Тунам «Автодор» тӱвыра пӧртыштӧ «Югорно» студий пашам ыштен. Усталык шӱлышан ӱдыр-рвезе-влак тушто гитар ден шокташ тунемыныт, мурым муреныт, тӱрлӧ мероприятийыште шкеныштым ончыктеныт. Пайдале студент пагытым Диана моштен кучылтын.
Таче тудо кок шочшан ава. Икшывыже-влак йочасадыш коштыт. Диана Ямбаршева шӱм пелашыжым Волжский районысо Помар селаште муын, Кубикова лийын. Ты еш кызыт Советский посёлкышто еҥын пачерым айлен ила, ончыкыжым шке илымверан лияш шона. «Мыланна Советскийыштак моткоч келша. Йошкар-Олашке илаш каяш огына шоно. Вет тыште пашаверна, йоча-влаклан йочасад, тораштак огыл ача-авана илат. Еҥ-влак палыме улыт, нунын дене пашам ышташ мылам — кугу пиал», — мане тӱвыра пашаеҥ.
Диана Аркадьевна деч «Кеҥеж канышлан иктаж-кушко канаш каяш шонет мо?» йодмемлан, тудо тыге вашештыш: «Канышем икшывем-влаклан пӧлеклем. Паркыш, атракционыш миен толына. Кечыгут нунын дене пырля лияш тыршем, вет пашалан кӧра коклан йоча-влаклан жап шагал кодеш. Кушкын шуытат, вара кугорнышкат лекташ лиеш».
Диана Ямбаршевалан пашаштыже сай кӱкшытыш шуаш, артист йолташышт-влак ден пырля гастрольыш лекташ да марий тӱвыра аланыште у муро дене чапланаш тыланена.