«Шочмо кундеметым палет мо?»

шочмо кундем

 Викторине

100 ий вашеш 100 йодыш

Тений Марий Эллан 100 ий темеш. Тидын лӱмеш лудшына-влак коклаште викториным увертарена. Тудо ныл тур дене эрта. Кокымшо турын йодышыжо-влакым майыште савыктена. Кажне турышто 25 йодыш лиеш. Викториным ноябрьыште иктешлена. Сеҥыше-влакым чапле пӧлек вуча.

1 тур

  1.  Марий ӱдырамаш-влакын 1-ше съездышт кунам лийын? Мыняр делегат толын?
  2. 1930-шо ийлаште могай еҥ да предприятий-влак СССР-ын орденже дене наградитлалтыныт?
  3.   С.Чавайнын лӱмжым Йошкар-Оласе урем-влаклан кок гана (ончыч да реабилитаций деч вара) пуымо. Кунам тиде лийын?
  4.  Совет Ушем Герой лӱмым налше марий еҥ нерген икымше книга кунам лектын? Кӧ нерген кӧ возен?
  5. Марий АССР-ын икымше заслуженный артистше – И.Т. Якаев. А МАССР-ын заслуженный артисткыже да калык артисткыже лӱм-влакым эн ончыч кӧмытлан пуымо? Да кунам?
  6.  Марий писатель-классик-влак кокла гыч кӧн кугезе уныкаже да кунам РМЭ Кугыжаныш премийым налын?
  7.  Кӧ ик колхозым 34 ий вуйлатен? Да могайым?
  8. Моло отрасльлаште (промышленность да тулеч молат) тыге кужун – 30 ий утла вуйлатыме пример-влак лийыныт мо? Лийыныт гын, нине еҥ-влакын лӱмыштым каласыза.
  9. Онча Европа ӧрын ӱдыръеҥым:

        «Тыгай шӱм-чон кушеч гына лектеш?

         А ӱдыр ныжылгын мура

         Шернур вел семым,

          Берлин, сукалтын, тудым колыштеш?»

Нине корнылам кӧ да кунам возен? Сар годым тудо кушто лийын?

10. Тыглай пашаште эн чот чапланыше марий ӱдырамаш – кӧ тиде?

11. Республикын эн кугу вуйлатышыжлан (Совет жапыште партий обкомын икымше  секретарьже, вара – президент, вуйлатыше) сар деч вара марий кокла гыч кӧмыт пашам ыштеныт?

12. Могай ийыште марийжат, ватыжат герой лийыныт?

13.  Тиде порт Йошкар-Олаште верланен? Жапше годым могай купеч тушто илен да кызыт тушо мо верланен?

14. Кӧлан республикын Госпремийжым кок гана (МАССР-ыным да РМЭ-ным) пуымо? Да кунам?

15. МАССР министрлан (наркомлан) шогышо марий ӱдырамаш-влакын лӱмыштым каласыза. Кӧ икымше лийын?

16.  Киношто модшо марий актер-влак кокла гыч кӧмытлан РСФСР (РФ)-ын заслуженный артистше лӱмым пуымо? Кунам?

17. Сар деч вара МАССР (РМЭ) правительстве председательлан шогышо марий еҥ-влакын лӱмыштым каласыза.

18. Марий Элыште мыняр район уло? Эн кугу районжо могай?

19.Тиде курык республикнан ик районыштыжо верланен. Могай тиде курык? Тудын нерген изиш палдарыза.

20. Озаҥысе университетын ХIX курым мучашысе профессоржын лӱмжым палыза. Тудо Морко район Арын села гыч лийын.

21. 1907 ийыште лекше икымше марла журнал кузе маналтын?

22.Марий научно шымлыше институтлан кунам Валериан Васильевын лӱмжым пуымо?

23.Марий АССР гыч Кугу Отечественный сар годым тушман дзотын амбразуржым кӧ эн ончыч шке капше дене петырен?

24. Марий Элын икымше президентше кӧ лийын?

25. Фотошто могай марий патырым ужыда? Тудлан памятникым кушто шындыме?