Школ – ялын шӱмжӧ

Марий Элысе образований да науко министерствын программыж почеш ынде ятыр ий икмыняр йочасад, школ, колледж, техникум туныктымо пашаште у йӧным кучылтмо шотышто пашам шуктен шогат. Тыгай туныктымо тӧнеж -влак регионысо инновационный образовательный площадкылан шотлалтыт. Нунын кокла гыч иктыже – Волжский район Карай кыдалаш школ. Проект почеш ты школысо туныктышо-влак марий йылмым туныктымо методике шотышто полыш материал-влакым ямдыленыт. Тылеч посна йочасадыш коштшо икшыве-влаклан шинчымашым пуышо сӱретан пособийым ыштеныт. Тудым мӧҥгыштӧ ача-ава-влакат кучылтын кертыт.

 «Кызыт ме творческий лабораторий семын пашам ыштена. Мемнан деке шкенан школысо туныктышо-влак веле огыл, Помар селасе кок воспитатель да Звенигово оласе ик туныктышо ушненыт. «Вершӧрем» лӱман внеурочный пашам ыштена. Кызыт марий йылме дене 2-шо класслан туныктымо книгам ямдылен шуктенна, – каласыш Карай школ директор Любовь Анатольевна Сергеева. –  Школ – ялын шӱмжӧ. Тудым эн ончычак ме, туныктышо-влак, аралышаш улына. Садлан, школна тачысе илышын йодмыжым шуктыжо манын, кажне туныктышына уло вийжым пыштен пашам ышта. Нигӧат «пеш кӱлеш» манын ойлен огыл. Ме урок деч ӧрдыжсӧ пашаланат вийым муына. Мутлан, гражданин да патриот улмо шӱлышеш туныктымо шотышто проектым возенна. Тылеч посна тӱрлӧ курсышто шинчымашым нӧлтена, шке моштымынам весылан пуэн кертына. Тыге мастарлыкнам пырля нӧлтена. Кызытсе пагытыште тале лийман, тыге веле ончыко каен лектат».

Чон почын пашам ыштет гын, лектышат лиеш маныт. Адакшым кеч-могай коллективыште ваш умылымаш уло гын веле паша ушнен толеш. Шижалтеш, Карай школысо туныктышо-влак келшен илат, ик шӱлыш дене пашам ыштат. Садлан тиде школышто тунемше-влак чолга улыт. Нуно тӱрлӧ предмет дене олимпиадылаште эре сеҥыше радамыш логаледат.

Снимкыште: Л.Сергеева, П.Захарова, П.Ипатов