манеш Шернур посёлкын чолга мотор ӱдыржӧ Екатерина Рыбакова. Тудо марий йылмынам, сылнымутнам моткоч йӧрата, а тидыже Катялан пӱртӱс деч пуалтын манам гын, йоҥылыш ом лий, очыни.
– Мый Шернур посёлкысо Николай Заболоцкий лӱмеш кокымшо номеран школышто индешымше классым тунем пытаренам. Яра жапемым сылнымутлан пӧлеклем: почеламутым лудам, шкеак возкалем. Тыгак илышыштем кугу верым сӱрет налеш. Пӱртӱсым, янлык-влакым, нунын койышыштым сӱретлаш шӱман улам. Тидлан мыйым сылне пӱртӱсна кумылаҥда. Тӱрлӧ вере лияш йӧратем, Марий кундемын кажне лукшым шымлынем. Туге гынат Шернур вел мыланем эн лишыл да эн сылне кодеш.
– Пӱртӱсым йӧратымет нерген каласышыч. Идалыкын могай пагытше чонетлан эн лишыл?
– Шошо. Тиде пагытыште пӱртӱс помыжалтеш. Олмапу, вишне, сирень пеледыт, шке тамле пушышт дене воктенышт войзалташ, фотосӱретым ышташ ӱжыт. Тыгодым кумылем нӧлталтеш! А куэр лоҥгаштыже кайык-влак туге сылнын муралтат! Пырля муралтымет веле шуэш!
– Тугеже тый мурашат йӧратет?
– Моло йоча семынак изирак улмем годым мураш да кушташ йӧратенам. Районласе концертлаште моштымем ончыктенам. Мыйын эше ик йӧратыме изи годсо паша уло – пидаш да бисер дене тӱрлӧ арверым ышташ.
– Посёлкышто шочын-кушкынат гынат, марла сайын кутырет, йылмет лывырге…
– Коча-ковам деке Параньга район Элпанур ялыш унала коштмем годым кутырымыштым, гармонь почеш веселан муралтымыштым колыштын кушкынам. Мыйымат эре мурен-куштыктеныт. Адакшым авам Шернур тӱвыра пӧртыштӧ пашам ышта, йоча-влакым мураш, кушташ, гитар да гармонь дене шокташ туныкта. Санденжат, очыни, йылмынам, йӱланам пагалем да йӧратем.
– Школыштыда марий йылмым шочмо йылме семын тунемыда?
– Уке, кугыжаныш йылме семын. Туге гынат визымше классыште тунеммем годым марий кугыжаныш йылмым туныктышо Софья Альбертовна Рослякова мыйым конкурслаште участвоватлаш кумылаҥден. Школысо, районысо, республикысе, Российысе, тӱнямбалсе конкурслаште вием тергем. Мутлан, налаш «Илыше классике» конкурсым. Тушто мый визымше класс гыч тӱҥалын, индешымше класс марте участвоватленам. Тыгак «Радуга над Кокшагой», «Музыкальный экспресс» фестивальлаште прозым лудынам, «Колумб лудмаш», «Яналов лудмаш» конкурслаште мастарлыкем ончыктенам. Эреак лауреат да дипломант лийынам. 2018 ийыште «Ямде лий» газетын Антонов Ивук лӱмеш премийже дене палемдалтынам. Кажне тыгай конкурсышто авамын да ковамын полышыштым шижам. Садланак нунылан да Софья Альбертовналан кугу таум каласем.
– Марий сылнымутышто кӧн возымыжо келша? Утларакше мом лудаш йӧратет?
Валентин Колумб, Миклай Казаков, Майоров-Шкетан, Йыван Кырла, мыйын шонымаште, марий калыкын эн тале поэт ден писательже-влак улыт. Кызытсе возышо-влак коклаште Зоя Дудинан, Светлана Григорьеван почеламутышт-влак келшат.
Утларакше марий ойлымаш-влакым да руш романым, фантастикым, детективым лудаш йӧратем.
– Ончыкыжым могай профессийым ойырен налаш шонет?
– Кызытеш могай профессийым ойырен налам, ом пале. Тидын нерген шоналташ эше кок ий уло.
– Вашмутет-влаклан тау. Ончыкыжымат тыгаяк чолга лияш тыланем.