Кугу опытан сад-пакчазе Л.А.Абрамова темла.
Февраль мучаш – март тÿҥалтыш
Шере пурыс – шокшым йöратыше кушкыл. Тудо теплицыште але пленко йымалне сайынрак шочеш. Нöшмым кунам ÿдыман?
Росота кушмо жапым (60-70 кече) да тудым кунам луктын шындышашым палыман. Тыгак нöшмö шытен лекме пагытым (8-10 кече) шотыш налман. Южгунам нöшмö 20-25 кечат шытен лектын кертеш. Тиде южын температуржо дене кылдалтын. Ме шукыж годым ямдылыме пурыс нöшмым февраль мучаш – март тÿҥалтышыште ÿдена. Тидлан тÿрлö атым кучылташ лиеш.
Ӱдышаш рокым шыжым налын кодыман. Сöрем рокым, торфым, перегной ден эҥерысе ошмам икнаре налын, пырля варен, чыла кушкыллан келшен толшо рокым ямдылаш лиеш. Ик ведра тыгай грунтыш 1-1,5 стакан ломыжым ешарыман. Рок вартышым ÿдымö деч ончыч ышташ гын, сайрак. Шере пурыслан рокым «куштылемдашат» лиеш. Тидлан торфан вартышыш вермикулитым але тыгыдемдыме пенопластым пышташ лиеш. Шке ямдылыме рок вартышым шокшо вÿд дене когартыман але марганцовко дене эрыктыман (10 литр вÿдлан – 3 грамм). Рок вартышыш свежа терысым, йыраҥысе рокым але ямдылалт шудымо компостым пыштыман огыл.
Гибрид сорт пурыс сайын шочеш. Нöшмым специализироватлыме кевытлаште налман. Саска гыч налын, шке ыштыме нöшмö денат чапле саска шочеш манын ида вучо.
Нöшмым 1-1,5 см келгытыш ÿдыман. Атым яндар пленко дене леведын, леве верыш шындыман. Нöшмö шытен лекмеке, росотам волгыдо верыш кусарыман. Уке гын тудо вигак шуйнен кушкеш. Росота ынже шуйно манын, тудо 8-12 шагат (шым шагат эр гыч шым шагат кас марте) волгыдышто лийшаш. Кок арня наре тыге куштыман. Икымше кечылаште йÿдымат волгалтараш темлалтеш.
Могай лампе келшен толеш?
Люминесцентный лампым муаш куштылго. Тыгодым тудын тулжо эн келшен толшо: тушто канде ден йошкар спектр-влакат улыт. Но тиде лампе тора гыч ок волгалтаре. Росота деч 15-35 сантиметр коклаште вераҥдыман.
Металлогалогенный лампыште канде спектр уке. Тудын деч посна росота начаррак лиеш.
Фитолампе шерге огыл, сайлан шотлалтеш. Но айдемын шинчажлан эҥгекым ыштен кертеш.
Натриевый лампе чыла шотыштат пайдале, но акше шергырак.
Накаливаний лампе ешартыш волгыдым пуашлан йöршеш келшен ок тол.
Тулым ешараш фольга полша. Тидлан картонеш фольгам пижыктыман да росота шеҥгелан вераҥдыман. Кечын волгыдыжо фольгаш логалын волгалтеш гын, росоталан ешартыш тул лиеш.
Пикироватлена
Росотан 1-2 лышташан лиймекыже, тудым кусарен шындаш (пикироватлаш) лиеш (атын диаметрже – 8 см). Кушкылым мыняр шагалрак кучылтат, тунар тудо пеҥгыде лиеш. Пикироватлыме годым тÿҥ (осевой) вож мучашым чывыштал налаш кÿлеш. Вожым рок дене нöшмö лышташ петырнымешке урыман. Рок ÿдымö годсо гаяк лийын кертеш. Кусарен шындымеке, росоташ пöлемысе температуран шинчыктыме вÿдым шавыман. Кушкыл-влакым 1-2 кечылан пычкемыш верыш шындыман але волгыдо деч авырыман. Вара азотан удобренийым ешараш лиеш (терыс вÿд, кристалин). Но чыве терысым тиде этапыште кучылтман огыл.
Росота чотак шуйнаш тÿҥалеш гын, тудым юалгырак верыш шындыза, пöлемыш яндар южым пуртыза. Укшышто ÿлыл лышташым чывыштал налаш лиеш. Тыге кушкыл 7-10 кечылан кушмым чарна да вургыжым кÿжгемда.
Кунам вÿдым шавыман?
Кушкыл чапле лийже манын, росоташ вÿдымат шот дене оптыман. Тидым лучо эрдене ышташ. Рок вошт нöрышаш. Вÿдым кунам оптышашым палаш манын, кушкылым шындыме рок ÿмбаке 1 см наре когартыме ошмам опташ лиеш. Ошма кошка гын, вÿдым шаваш лиеш.