«Марий мурсем» ансамбль Марий кугыжаныш университет ден институт пелен пашамышта.Тудым самдеятльный композитор, Марий Эл культурын сулло пашаеҥже Р.С.Алексеев вуйлата.
– Родион Сергеевич, ансамбльлан молан лач «Марий мурсем» ансамбль лӱмым пуэнда?
– Шке жапыштыже пединститутышто «Мурсем» ансамбль лийын, а эше ончыч – университет пелен «Риа-Риа». Кок вузым ушымеке, «Марий мурсем» ансамбль шочо. Университет кок ансамбльым кучен кертын огыл, сандене иктыш ушеныт. Лӱмым участник-влак дене пырля шоненна.
– Кызыт ансамбльыш мыняр еҥ коштеш?
– 15-18 еҥ коштеш. Нуно тӱрлӧ факультет гыч улыт, но шукынжо – Калыкле тӱвыра да тӱвыра кокласе кыл инситутын студентше-влак. Тыгак спорт да туризм, физмат, историко-филологический факультетла гыч улыт. Тӱвыра да сымыктыш колледж гычат рвезе-влак коштыт. Ондакше пашам ыштыше-влакат мемнан дене лийыныт, кызыт тыгай-влак уке улыт.
– Репетиций кунам да кушто эртаралтеш?
– Арнялан кок гана: кушкыжмын да вӱргечын – погынена. Иктаж концерт деч ончыч кум ганат погынаш логалеш. Репетиций-влак пединститутын актовый залыштыже эртаралтыт. Мемнан хораографна Василий Евгеньевич Кириллов «Марий Эл» ансамбльыште кушта. Паша деч вара мемнан деке толеш.
– Районлашкат концерт дене лектыда. Пытартыш жапыште огыл кушко миенда?
– Районлашке коштына. Теве Медведево район Руш Кукмарийыш миенна. Клубыштат, школыштат концертым ончыктенна. Калык куанен вашлийын. Тидыже маланна эн шерге.
– Шошым Ульяновск олаште эртаралтше «Много народов – один мир» XIV тӱнямбалсе йылме фестивальыш миенда.
– Фестивальыш шуко еҥ погынен. Китай гычат толшо-влак лийыныт. Тыгак Киров, Пошкырт, Чуваш кундемла гыч миеныт ыле. Тушто МарГУ-н студенткыже Настя Галиева – марий йылме нерген презентацийым эртарен. Моло участник-влак марий куштымаш дене мастер-классым ончыктеныт.
Ансамбль – чон йодмо почеш ыштыме паша. Сандене «Марий мурсем» ансамбльын участникше-влак мурат, куштат, чоныштым кандарат гына огыл, тыгак марий тӱвырамат моло-влаклан чонышкышт шыҥдарат.
Родион Сергеевич Алексеев (покшелне гармонь дене шога) Морко район Азъял ялыште шочын-кушкын. 1977 ийыште Азъял кыдалаш школым тунем пытарен да культпросвет училищыш баян дене шокташ тунемаш пурен. Тунем пытарымеке, Морко район Коркатово школышто да клубышто пел ий пашам ыштен. Умбакыже Озаҥ оласе тӱвыра институтышто шинчымашым поген. Направлений почеш Моркышто пашам ышташ тӱҥалын. Вара – армий. Служитлен толмеке, Йошкар-Олаште пашам ыштен. Сеҥымашын ХХХ идалыкше лӱмеш тӱвыра полатыште «Народный театр» студийыште тыршен. Тушто Родион Сергеевич баянист лийын, спектакльлан мурым возкален. Икымше «Шыргыжмаш» мурыжо тудо пагытыште шочын. Р.Алексеевын муро сборникшат уло. Тудын мурыжо-влакым шуко мурызо йоҥалтара. Иктыже – Зоя Берникова.