Тиде историй Медведево районысо Светлый посёлкышто верланыше 7-ше №-ан колонийыште «Декоративно-прикладное искусство» кружокын ик занятийыштыже лийын. А такшым ты историй шукерте ожно тӱҥалын, но кунамжым але шымлаш кӱлеш
Колонийыште шинчыше ӱдырамаш-влак каныш кечын чонлан келшыше занятийыш коштыт. «Декоративно-прикладное искусство» занятийыште икте курчакым, весе пушкыдо модышым урга але декупажым ышта.
Декупаж – тӱрлӧ арверым сӧрастарымаш але тудлан у шӱлышым пуртымаш. Тиде пашам ыштыше мастар-влак тӱрлӧ стильым кучылтыт. Нунын кокла гыч иктыже – рустикальный. Тиде материалын текстурыжым огеш алмаште, а арален кода.
Рустикальный стиль дене сӧрастараш манын, кокла кугытан ик шондыкым конденыт. Кушеч да кӧн тиде шондык – пале огыл. Ондакысе озаже тудым кудалтен кайыме суртышто муын. Вара икмыняр жап гыч тудын кӱлдымыжым умылен да шондыкым клатыш наҥгаен. А икана, оккӱл арверым кораҥдылме годым, тиде шондыкым муын, но кудалташ чаманен, сандене 7-ше №-ан колонийын клуб вуйлатышыже да тӱрлӧ кружокым эртарыше Ирина Цветковалан пӧлеклен. Ирина Викторовна тыгай пӧлек деч тореш лийын огыл. Арверым колонийысе фольклорный тоштерыш конден. Но ондак ӱдыр-влаклан сӧрастараш темлен.
Пашам тӱҥалмеке ужыныт: арверым кок ужашлан пайлыше материал тоштемын, сандене уэмдаш пижыныт. А кӧргыштӧ сар гыч салтакын колымо нерген колтымо серышым муыныт.
Серышыште мом возымо, чылажак раш огеш кой, но лудаш лиеш: «1943 ий 22 сентябрьысе извещений. Тендан эргыда сержант Михаил Иванович Горбунов Социалистический Родина верч кредалмаште шке патырлыкшым ончыктен да 1943 ий 4 сентябрьыште геройла колен. Тудым Смоленск областьысе Щепелево ял воктенысе шӱгарлаште тоеныт». Серыш мучаште – районысо военкомын кидпалыже.
Тиде исторический документым колонийыште шинчыше ӱдырамашвлак воспитательный пашам шуктышо пӧлкан пашаеҥже-влаклан пуэныт. Нуно тиде кагазым мумылан пеш ӧрыныт. Каҥашымеке, сержант Горбуновын родо-тукымжым, уныкажым але кугезе уныкажым муаш кутырен келшеныт.
Тылеч посна колонийысе кружок занятийлаште шымлыме пашам шукташ тӱҥалыныт. Иктаж-могай ешартыш уверым пален налыт гын, посна пырдыжгазетым ямдылаш шонат. А «шӧртньӧ» шондыкым сӧрастареныт. Тудат ынде шкешотан историйыш пурен.