Шукерте огыл Марий Эл радион ондакысе вӱдышыжӧ, марий мер толкынышто кумдан палыме Людмила Карпован (Алексееван) ешыштыже кугу куан лие: самырык ача-аван изи падыраш ӱдырышт ош тӱням ужын.
Людмила ешыж дене кызыт Москошто ила. Шочмо вершӧрым коден каяш неле лийын мо? Кугу ола тудым кузерак вашлийын? Нине йодыш-влаклан Людмила тыгерак вашештыш:
– Москош илаш куснымылан вашке кок ий лиеш. Ончыкылык пелашем тунам Москошто пашам ыштен. Шӱртӧ име почеш кая, маныт калыкыште, сандене сӱан деч вара мыят пелашем дек толынам. Чыным ойлаш гын, кайымем нимынярат шуын огыл: шочмо вершӧр, родо-тукым, йӧратыме паша воктенак лийыныт. Но ӱдыръеҥын пӱрымашыже тугай, садлан чон корштенак каенам. Ик ий неле лийын: у ола, у паша, у еҥ-влак.
Паша нерген каласаш гын, тӱрлӧ аланым онченам, но кӱшыл шинчымашым налме специальностьым ойыренам, туныктышылан ыштем.
Жап эртымек, илыш шолаш тӱҥале: тӱрлӧ мероприятий, конкурс, концерт, вашлиймаш-влак… Поснак марий дискотеке нерген каласен кодынем. Москошто шуко марий еҥ ила. Икте-весе ден палыме лияш, жапым веселан эртараш, марий шӱлыш дене шӱлалташ кумылан-влаклан Юлия Смуглая тыгай мероприятийым эртара. Тудлан кугу тау.
Кызыт илышем йӧршын вашталтын: паша, мер илыш шеҥгек шӱкалалтын. Амалже кугу: шукерте огыл ава лийынам. Мӧҥгыштына аза йӱк шокта, тидыже ик эн кугу пиал. Изи падыраш ӱдырналан Алиса лӱмым пуэнна.
Лӱмым шукын шонаш полшеныт: тӱҥ шотышто акамын изирак Катя ӱдыржӧ (шӱжарым чот вучен), ава лийшем, пелашемын шӱжарже, моло-влакат ушненыт. Мо оҥайже, шочмекыже, кум кече могай лӱмым ойыраш пален огынал. Ондак Василиса манын лӱмдаш шоненна ыле, но эмлымверыште врач вучыдымын йодо: «Кузе лӱмдаш шонеда?» Мый иканаште «Алисам пуынена да…» маньым. Тыге ме илыш йомакнам возаш тӱҥалынна. Ӱдырнан илышыже Льюис Керроллын «Алиса в стране чудес» йомакысе гай весела, поро пашалан поян лийже!