«Мемнан Сеҥымаш кечына» («Наш День Победы») акцийыш таче Башкортостан ушнен.
Россий президентын Юл кундем федеральный округысо полномочный представительжын темлыме ты акций нерген Интернетыште материал-влак #песнипобедыПФО #нашденьпобеды хештег дене шыҥдаралтыт.
Чапланыше мурым Башкортостанын калык хоржо республикын рӱдоласе Сеҥымаш паркыште мурен. Видеом тений март мучаште «мӧҥгыштӧ шинчыме» режимым увертарыме марте возымо.
Сар годым Башкирий гыч фронтыш 700 утла тӱжем еҥ каен. 322 утла тӱжем пӧртылын огыл. Тулан жапыште лӱддымын кредалмылан 200 тӱжем утла еҥ орден да медаль дене палемдалтын. 295 салтак Совет Ушемын Геройжо лӱм дене чапланен, 46 еҥ Слава орденын тичмаш кавалерже лийын. 2020 ийыште, колымыж деч вара 77 ий эртымеке, чапланыше 112-шо Башкирский кавалерийский дивизийын командирже, генерал-майор Минигали Шаймуратов Совет Ушемын Геройжо лӱм дене палемдалтын. Сар жапыште республикыш 280 тӱжем еҥым да 170 утла промышленный предприятийым эвакуироватленыт. Уфасе моторостроительный завод 51 тӱжем утла авиамоторым да самолетым ямдылен. Башкирий тыгак эллан 5 миллион тонн утла нефтьым да 160 миллион пудов киндым колтен.
Ушештарена: 9 Май пайрем вашеш увертарыме акций «Мемнан Сеҥымаш кечына» («Наш День Победы») маналтеш да муро марафон семын эрта. 8 май марте Юл кундемысе чыла регионышто Сеҥымаш муро тӱрлӧ калыкын йылмыж дене йоҥга. Тӱҥалтышым 25 апрельыште Мордовий ыштен. 26 апрельыште марла муреныт, нунын почеш — удмуртла да башкир йылме дене.