Таче «Сеҥымаш кече» муро Юл кундем федеральный округышто рушла да марла йоҥга
Ушештарена: Марий Эл «Мемнан Сеҥымаш кечына» («Наш День Победы») акцийыш ушнен, тудо муро марафон семын эрта. 8 май марте Юл кундемысе чыла регионышто Сеҥымаш муро тӱрлӧ калыкын йылмыж дене йоҥга. 25 апрельыште мордва йылме дене муреныт, таче ты мурым Интернетыште #песнипобедыПФО #нашденьпобеды хештег дене марла колышт-ончаш лиеш.
Композитор Д.Тухмановын семжылан да В.Харитоновын мутшылан возымо «Сеҥымаш кече» («День Победы») мурым марла Я.Эшпай лӱмеш Марий кугыжаныш филармонийын артистше-влак, А.Искандаров лӱмеш Марий кугыжаныш хор капеллын солистше-влак «Марий кундем» калык семӱзгар оркестрын шоктымыж почеш мурат. Видеороликым «Марий Эл Телерадио» телеканалын вийже дене «мӧҥгыштӧ шинчыме режимым» увертарыме деч ончыч ыштыме.
— Пеш волгыдо шонымашан, чоным тарватыше тиде акций гоч ме Юл кундемысе федеральный округ гыч тӱрлӧ усталык коллектив-влакым ужын кертына, нуно кумдан чапланыше мурым шке йылмышт дене йоҥгалтарат. Патриот шӱлышан ты паша мемнам иктыш чумыра. Россий президентын Юл кундем федеральный округысо (ПФО) полномочный представительже Игорь Комаровын темлыме ты акцийым кажне ийын эртараш лиеш, — манеш Марий Эл Республикын тӱвыра, печать, да калык-влакын пашашт шотышто министр Константин Иванов.
Видеосюжетым тӱҥ шотышто Йошкар-Олаште Курымашлык тул воктене ыштыме. Тыгак клипыште Кугу Отечественный сарыште патырлын кредалмым ушештарыше моло монумент-влакат палдырнат: Палыдыме салтаклан памятник, Герой-влаклан да тылыште тыршыше-влаклан Чап аллей. Изи Какшан сер да Благовещенский башне рӱдолан тачысе сынжым почын пуат.
Кугу Отечественный сарыш Марий кундем гыч 142 тӱжем утла еҥ каен, пелыже наре пӧртылын огыл — 75 тӱжем наре салтак курымешлан вуйжым сар пасуэш пыштен але пленыште индыралт колен. 53 еҥ лӱддымын кредалмыжлан Совет Ушемын Геройжо лӱм дене палемдалтын, 14 воин Слава орденын тичмаш кавалерже лийын.
Мут толмашеш, «Сеҥымаш кече» мурыланат тиде идалык — лӱмгечан икымше гана 45 ий ончыч йогалтын.
#песнипобедыПФО #нашденьпобеды
МЭТР телеканалын сюжетше: