«Мемнан Сеҥымаш кечына» (Наш День Победы) муро марафоным таче Оренбург область иктешла. Россий президентын Юл кундем федеральный округысо полномочный представительжын темлыме акций нерген Интернетыште материал-влак #песнипобедыПФО #нашденьпобеды хештег дене шыҥдаралтыныт. Чыла видеороликым элыштына мӧҥгыштӧ шинчыме режимым увертарыме марте возымо.

Мурым Оренбургысо кугыжаныш академический руш калык хор мурен.

— Сеҥымаш кече дене Юл кундемыште илыше-влакым тыге саламлыме акцийыш ме уло кумылын ушненна. Вет мурын мутшат, семжат ойыртемалтшын йоҥга. Сандене кажне артист сеҥымашын гимнжым посна шӱлыш дене, уло чоным пыштен мура. Оренбург кундемыште тидын шотышто шкешотан йӱла уло: муро тӱҥалтыште чылан совым кырат, а вара ты сем йӱк дене куан кумыл иктеш варналтын эшеат кумдан шарлымыла чучеш, — манеш коллективын солистше Владимир Решетков.

Кугу Отечественный сарыште Оренбург кундем гыч 411 тӱжем еҥ кредалын. Тушеч 187 тӱжемже пӧртылын огыл. 43 оренбуржец Чап орденын тичмаш кавалерже лийын, 235 еҥ Совет Ушем Герой лӱм дене палемдалтын, 65 тӱжем салтак «За отвагу» медалян лийын.

Оренбург кундемыш сар ийлаште 90 предприятийым кусареныт. Тышеч фронтыш 1595 самолетым, авиацийлан тӱжем дене шапаш ужашым колтеныт. Эвакуироватлыме 240 тӱжем еҥ тыште мӧҥгӧ олмеш кокымшо илыме верым муын. Ныл ий жапыште оласе госпитальыш 28095 черле ден эмганышым намиеныт. Тылыштат еҥ-влак ярнымым палыде тыршеныт: кугыжанышлан 124 миллион пуд пырчым, 6,2 миллион пуд шылым да моло ялозанлык кочкышым колтеныт.

Тыгеракын «Мемнан Сеҥымашна» акций гоч ме Юл кундемысе регион-влакын сар годсо илышыштым изиш да пален нална, «Сеҥымаш кече» мурым тӱрлӧ йылме дене йоҥгалтарымым колна, видеосюжетым ончышна. Шучко пагытыште уло калык «Чылажат фронтлан, чылажат сеҥымашлан!» ӱжмаш дене илен, пашам ыштен. А таче ме чылан пырля куанена.

Пайрем дене, Кугу Сеҥымаш кече дене!

Ушештарена: 25 апрель гыч акцийыш Мордовий, Марий Эл, Удмуртий, Чуваший, Башкортостан ден Татарстан, Пермь край, Самара, Угарман, Саратов, Ульяновск, Пенза, Киров да Оренбург область-влак ушненыт. «Сеҥымаш кече» муро руш да тушто илыше тÿп калык-влакын йылмышт дене йоҥгалтын. 9 майыште марафон иктешлалтеш.

Сайт ден социальный сетьлаште проект нерген #нашденьпобеды, #песнипобедыПФО хештег гоч пален налаш лиеш.