Тыге март тӱҥалтыште Йошкар-Олаште эртыше концертыште икмыняр гана увертарышт. Тунам Виче кундем ден Марий Эл дене келшен илыме ойпидыш почеш, Киров велыште шочшо-влак лӱмеш ты мероприятий эртаралтын ыле. Вятские Поляны ола гыч толшо коллективын лӱмжӧ «Пеледыш» маналтеш. Тиде ансамбльым Ю.Ш.Искаков (пурла снимкыште) 2017 ий годсек вуйлата.
«Кызыт коллективышкына 12 еҥ коштеш. Шуко участникна Малмыж районышто шочын. Мый шкеже Вятские Поляны олашке пашам ышташ толынам да тышанак кодынам. Шочынжо Татарстан Республик Кукмара район гыч улам. 1979 ийыште физике специальность дене Марий кугыжаныш университетым тунем пытаренам. Судостроительный, машиностроительный да военный заводлаште пашам ыштенам. Профессием физике денак кылдалтын, тӱрлӧ прибор-влакым, лабораторийыште качествым тергенам», – мане Юрий Шамраевич.
Изи Юра гармоньым кидышкыже 4-ше классыште тунеммыж годым кучен. Кок изаже тунам ты семӱзгарым шоктен моштен, сандене шольыштат нунын почешышт семым лукташ тунемын. Ик изаже, Леонид Александрович Искаков, кызыт «Кна вел» ансамбльым вуйлата. Тудо ачалӱмжым вашталтен. 8-ше классыште тунеммыж годым Юрий баяным шокташ тӱҥалын. Музыкальный шинчымашыже уке, сандене ното-влакым шкеак шымлен да МарГУ-што 4-ше курсышто улмыж годым шиялтыш дене шокташ тунемын.
Варажым Ю.Ш.Искаков баян, гармонь да шиялтыш дене регион-влак кокласе тӱрлӧ конкурслаште участвоватлен да сеҥыше радамыш логалын. Тений 22 февральыште «Радужное многоцветие России» фестиваль-конкурсышто татар семым шоктен да II степенян лауреат лийын. А кок ий ончыч Юрий Шамраевичлан эн сай гармоньчо улмым пеҥгыдемдыше дипломым кучыктеныт. Татарстаныште эртаралтше «Играй, гармонь!» конкурсышто эре участвоватла да призовой верлашке лектеш.
Йошкар-Олаште 7 мартыште лийше концертыште Ю.Искаков руш, татар, одо, марий, курыкмарий, Виче кундемысе сем-влакым шоктыш. Ты кечынак тудын вуйлатыме «Пеледыш» ансамбль Параньга район Кугу Пумарий селаште концертым ончыктен.
Коллективын репертуарыштыже тӱрлӧ марий сем почеш ятыр мурокуштымаш уло. Ансамбльыште музыкальный шинчымашан ик еҥат уке, хореограф пашамат участник-влак шкешт шуктат, тӱрлӧ куштымашым шындат. Эн кугурак ийготан участниклан кодшо ий декабрьыште 68 ий темын, а эн самырыклан – 29 ий. Нунын коклаште медицине, торговльо пашаеҥ, бухгалтер, орол да шукынжо пенсионер-влак улыт.
Тений марте репетицийым национальный культур-влакын «Этномир» рӱдерыштышт эртареныт. Тушто татар, руш, удмурт, марий калык-влакын ансамбльыштлан выступатлаш залым пуэныт. А 2020-2021 ийлаште ты залыште ик федеральный программе дене кинофильмым ончыктат, сандене коллектив-влаклан жаплан вес верым кычалаш верештын.
«Пеледыш» ансамбль кертмыж семын тӱрлӧ конкурслаште участвоватла. 2017 ийыште Озаҥыште лийше «Этномириада» конкурс-фестивальыште сеҥен. Тудым Крым Республикыш выступатлаш ӱжыныт улмаш, но участник-влак каен кертын огытыл. А тылеч ончыч коллектив Йошкар-Олаште эртаралтше «Поёт родное село» всероссийский фестивальыште лауреат лӱмым сулен.
Юрий Шамраевич – чолга еҥ. Лу ий наре сулен налме канышыште гынат, мер пашаштат полшаш тырша. Сандене тудым илыме кундемысе еҥ-влак Марий калыкын XI погынышкыжо делегатлан сайленыт.
Кажне шыжым Виче кундемыште эртарыме Марий тӱвыра кечылаште Юрий Искаковым вашлияш лиеш. Тудо гармоньым чот жапла, сандене тунемше-влаклан ты семӱзгарым туныктымо классым почаш шонымаш дене ила. Тылеч посна тӱрлӧ калык-влакын семыштым шоктышо гармоньчо-влак дене кылым куча. Нунын дене «Всё под гармонь…» концертым эртараш кутырен келшен. Ты уста гармоньчын полшымыж денат Виче кундемыште илыше самырыквлак марий семым шоктен мошташ тӱҥалышт ыле…