Самырык гынат, тудлан ӱшанат

 Икана, школышто диспансеризаций эртаралтме жапыште, мыят стоматолог деке пурен шогальым. Тылеч ончыч пӱйым эмлыме годым кучылталтше ӱзгар-влак шинчашкем логалын огытыл, а ты гана чылажат моткоч оҥайын чучын. Ты профессий да тыште кучылталтше ӱзгар-влак нерген шукырак палыме шуын, – ойла врач-стоматолог Павел Королёв.

Чылажат лач тышеч тӱҥалын. Тунам Павел Курыкмарий район Йоласал школышто 9-ше классыште тунемын. Ятыр рвезе семынак техникылан шӱман лийын, футболла модаш йӧратен, врач лияш шоненат огыл. Но 11 класс деч вара Павел, моло вузлаш вес профессий дене тунемаш пурен кертын гынат, Чуваш кугыжаныш университетыш врач-стоматологлан тунемаш каен.

– Ача-авам тунемаш кайымешкем могай профессийым ойырен налмем пален огытыл. Варажым куаненыт веле. Молан манаш гын мемнан ешыште чылан гаяк медицине пашаште тыршат: авам – фельдшер-лаборант, ачам вашкеполыш машинам виктара, акам – медшӱжар. Мый ынде ик ий наре Йошкар-Оласе ММЗ поликлиникыште пашам ыштем, пломбым шындем, кариесым эмлем. Ончыкыжым ортопед лияш ямдылалтам, садлан Чуваш кугыжаныш университетыштак ординатурышто тунемам, квалификацийым нӧлтем, – каласыш Паша.

Шижалтеш: 23 ияш рвезе ойырен налме профессийжым йӧрата. Тидын деч посна пашам ышташ неле дыр. Рвезын ойлымыж почеш, ик курсышто тунемше 115 выпускник кокла гыч 25 нарыже веле пӱйым эмла. Тунемаш пурымекат, шукынжо тунеммым кудалтен каеныт. Ты профессий куштылго огыл. Но Павел деч ты шотышто ик ӧпке мутымат колаш ыш логал. Стоматологлан могай лияш кӱлмӧ нерген самырык врач тыгерак каласыш:

– Мемнан пашаште ответственный лийын моштыман. Ме еҥ-влакын тазалыкышт верч вуйын шогена. Тыгак эмлалташ толшо кажне еҥ дене тӱрлӧ семын койын моштыман. Пӱйым эмлыше врач деч йоча веле огыл, кугыеҥ-влакат лӱдыт. Садлан кугурак-влак дене южгунам йоча дене мла мутланаш логалеш. Ала-кӧлан пеҥгыдынракат ойлыман. Икманаш, тиде моткоч оҥай. Вузышто тунеммем годым пашам ышташ кумылем йомеш манын, эре лӱдынам. Но кызыт умылем: тылеч сайрак профессийым шканем муам ыле мо, ала?

Павел стоматологлан 2018 ий гыч веле ышта гынат, тудын шке пациентше-влак улыт, нуно рвезе деке уло кумылын толыт, самырык врачлан ӱшанат. Ончыкылык нерген шонкалыме нерген мут лекмеке, Павел тыгерак каласыш:

– Илыш ончыкта, кузе лиеш. Шонымаш-влак шуко улыт. Кеч-мо гынат, пашам уло кумыл дене ыштыман. Шонымашке лӱдде кайыман, ӧрман огыл. Школым тунем пытарыше-влакланат тидымак тыланем.