У Торъял район Тошто Торъял тӱвыра пӧрт пеленысе «Ший оҥгыр» ансамбль 2010 ийыште у шӱлышым налын. Ожнат тыгай лӱман коллектив лийын, но вара шаланен. А вара тышке аккомпаниаторлан Надежда Якимован толмекше, паша шолаш тӱҥалын.
«Ончыч ансамбльым Галина Валерьевна Садовина вуйлатен. Вара тудо школ директорлан пашам ышташ тӱҥале да коллективым мылам ӱшанен пуышт, – каласкала Надежда Эриковна. – Эн ончыч Оршанке педколледжым тунем пытаренам. Вара Тошто Торъял школышто музыкым куд ий туныктенам. Тылеч вара Марий кугыжаныш университетыште «Марий филологий» специальностьым нальым. Кызытат шке шинчымашем пойдарем, университетысе магистратурышто тунемам, вашке «Этнокультурный рӱдерым вуйлатыше» специальностян лиям.
Н.Э.Якимова тӱвыра пӧртыштӧ 19 ий пашам ышта, тышеч куд ийжым – вуйлатышылан. Кеч-могай пӧртыштӧ сай оза лийшаш, тунам паша ворана. Теве Надежда Эриковнан чолга койышыжо, ура чонжо да пелен улшо полышкалышыже-влаклан тӱвыра пӧртыштӧ тӱрлӧ пашам виктарат.
2015 ийыште ты пӧртым капитально олмыктеныт. Леведышым вашталтыме, отопленийлан пуч-влакым шупшмо да телым олташ йӧнештарыме. «Кызыт тӱвыра пӧртна кугу полат гай чапле да мотор. Тыгай паша деч вара чон куана, – манеш Надежа Эриковна. – Тышке эре толмо шуэш, мурымо-куштымо кумыл шочеш. Санденак чӱчкыдынак тӱрлӧ мероприятийлаште участвоватлаш тыршена».
«Ший оҥгыр» ансамбльыш тӱҥ шотышто 12 еҥ коштеш. Тыгак ветеран-влакын хорышт уло. Тушто 21 еҥ мура. Аккомпаниатор Виталий Захарович Яндыганов вич тӱрлӧ занятийым эртара. Тудо йоча-шамычым мураш, кушташ, гармонь дене шокташ туныкта. Тыгак Виталий Захарович ятыр мурым возен, фонограммым ышта да «Эстрадный» кружокым почын. Сандене йоча-шамыч да ансамбльыш коштшо-влакат эстраде мурым мурат.
Культорганизатор Анатолий Никифорович Никитин йоча-шамычым спортлан шӱмаҥда. Шкенжынат тӱрлӧ видыште сеҥымашыже ятыр уло. Футбол дене модыт, куржталыт, кучедалме, «Умелые руки» кружокым вӱда. Тыште йоча-шамыч пу гыч тӱрлӧ статуэткым пӱчкедат, шукыж годым курныжым келыштарат, тӱрлӧ арверым ыштат, сӱретлат…
«Ансамбльыш коштшо вате-влак моткоч чолга улыт, ятыр фестивальыш, конкурсыш уло кумылын каят, – каласкала Н.Якимова. – 2017 ийыште Пошкырт кундем Мишкан районысо Ардаш ялыш кум кечылан миенна ыле. Тылеч ончыч тусо коллектив мемнан деке, Тошто Торъялыш, толын коштын. «Акарт» ансамбльым вуйлатыше Владимир Ильич Хамитов ӱжын ыле. Тунам ик кечын концертым ончыктенна, весын регион-влак кокласе «Кандыра» фестивальыште участвоватленна. Тунам еҥ-влак кок меҥге утла шуйнышо верыште кандырам куштеныт. Тыгак концерт программына дене Киров областьыш, Угарман кундемыш, республикысе икмыняр районыш миен коштынна».
Чынжымак, тӱвыра пӧртысӧ пашаеҥ-влак тыглай кечынат, пайрем годымат яра огыт шинче. Тений Сеҥымашлан 74 ий да Марий Эллан 100 ий темме вашеш мастарлыкым ончыктымо конкурсым увертарыме. Теве 7 мартыште У Торъялысе тӱвыра да каныме рӱдерыште Тошто Торъял ден Кугу Нурмо тӱвыра пӧрт-влак отчётный концертым ончыктеныт. Тыгодым кажне толшо еҥ Тошто Торъял тӱвыра пӧрт йоча-влакын кружоклаште пашам ыштымыштым ужын. Кугыеҥ-влакын «Ший оҥгыр» ансамбльыште уста участник-влак улмым сценыште эше ик гана пеҥгыдемденыт. Ветеран-влак хорын пашаштым икымше гана районышто ончыктымо.