Модельер лияш шонымашыже кандаш ий гыч шукталтын.
– Мыняр шкемым шарнем, эре пидаш йӧратенам. Очыни, икымше класс годсек кидпашалан шӱман улам. Ондак курчак-влаклан вургемым урген пидынам, варарак шканем, шӱжаремлан да авамлан ыштенам. Университетыште пырля тунемме ӱдыр-влаклан пидынам, – ойлыш Марина.
М.Иванова (ӱдыр фамилийже Степанова) Морко посёлкышто шочын-кушкын. Кызыт ешыж дене Йошкар-Олаште ила.
Школ деч вара конструктор-модельерлан Йошкар-Оласе технологический колледжыш тунемаш каяш шонен. Но МарГУ-ш Аграрно-технологический институтыш зоотехниклан пурен. Тунем лекмеке, кок ият пеле специальность почеш лабораторийыште пашам ыштен. Лабораторий петыралтмеке, кок ий утла кевытыште тыршен.
2015 ийыште Марина Морко район каче Арслан Ивановлан марлан лектын. Ончычсо шонымашыжым шукташ манын, конструктор-модельерлан заочно тунем лектын. Тунемме пагытыште Софья ӱдырышт шочын, идалык ончыч – Дима эргышт. Тидыже кидпашалан самырык авам эшеат чот кумылаҥден. М.Иванова эре пидеш, урга, тортым кӱэштеш, йӱштӧ фарфор дене ненчаш йӧрата.
– Тортым ышташ Ирина шӱжарем кумылаҥден. Эргыжын шочмо кечыжлан ямдылаш темлен. Тортым кӱэшташ – пеш оҥай да шкешотан паша, сӧрастарыме ужашыже поснак ойыртемалтеш. Тыгай годым шкем мультфильмысе феяла шижам. Мый кондитер омыл, лияшат ом шоно, но ты паша чонемлан чот лишыл, – ойла ӱдыр.
– Палем: тый сӱан тувырымат шкак ургаш шоненат?
– Сӱан тувырлан модельым Йошкар-Оласе технологический колледжыште пырля тунемме ӱдыр дене пырля ямдыленна. Тудак тувырем урген. Мыйын тунам опытем шагал манын шоненам, сандене ты пашалан пижын омыл. Шукерте огыл шканем спортивный костюмым ургенам. Ургымо стажем куд ий.
– Могай кидпашам утларак йӧратет?
– Ойыркалымаш уке. Мутлан, авалан да йочалан икгай тувырым, оръеҥын йолташ ӱдыржӧ-влаклан икгай юбко-влакым, бокал-влакым, оксам погаш шондыкым сӧрастарем. Тыгак упшым, шарфым, кардиганым пидам. Эмлымвер гыч кондымо годым азам чикташ «конвертым», пинеткым, фоамиран дене резинкым, заколкым, пушкыдо модышым ыштылам. Икманаш, мом кид дене ышташ лиеш – чылажат чонемлан лишыл.
– Соцсетьысе лаштыкыштет марий вургеман курчак-влакат улыт?
– Софья ӱдыремлан йочасадыш ышташ кӱлын, сандене ямдыленам. Нине вургемым кок кече жапыште ургенам. Шукыжым кид дене ургаш логалын. Деталь-влак изи улыт, машинке дене ургаш йӧндымӧ лийын.
– Кондитерлан тунемаш але шке ательем почаш шонымаш уке?
– Шонымаш моткоч шуко, но кушто чылалан жапым муаш? Иктым палем: верыште шогымем огеш шу, илыш дене тӧр кайыман.
Пӱрымаш чыла шке верышкыже шында. Маринан илышыштыжат тыгак. Ӱдыр, кӱшыл шинчымашым налаш манын, МарГУ-ш тунемаш пурен, но чон йодмо почеш садак ургызылан тунем лектын. Кызытат тудо чонлан келшыше да йӧратыме пашам шукта. Ӱшанена: илен-толын, М.Иванован шке ательежат, кондитерскийжат лийыт.
Еш альбом гыч налме фото-влак.