Морко районысо Весшӱргӧ ялыште 1953 ий 24 сентябрьыште вич шочшан ешыште Николай Павлов шочын. Кызыт Антонина пелашыж дене коктынат сулен налме канышыште улыт, Зеленогорский посёлкышто илат. Кум йочам ончен-куштеныт. Шым уныкашт уло. Николай Григорьевичым кидмастар семын палат. Иле шопке, шем да сур нӧлпӧ пушеҥгыла гыч тӱрлӧ арверым: совлам, кӱмыжым, сувенирым — ышта. Пашажым кумыл йодмо сомыллан шотла да пеш палдарашыжат огеш тӧчӧ. Айдемыжак тугай: тыматле, моктанаш ок йӧрате, тыглай еҥ. Лач ик гана арверже-влакым Медведево посёлкышто эртаралтше «Сказки марийского леса» выставкышке луктын. Тунам дипломант лийын.
Николай Григорьевич самырыкше годым Зеленогорский кыдалаш школ деч вара Йошкар-Олашке радиомеханический техникумыш тунемаш пурен. Вара армийыш миен толын. Пашам Зеленогорский чодыра комбинат пелен сувенир цехыште ыштен. Тушто лу ий наре тыршен, цех петырнымеке, чодыра комбинатышке пушеҥгым обрабатыватлыме станок механиклан налыныт. «Сувенирда-влак пеш сӧрал улыт, а тудым огыда чиялте мо?» — йодым. Мастар еҥ тыге каласыш: «Сӱретлаш сертификат кӱлеш. Садлан мыйын арверем-влак ошо улыт. Уданжак огыт кой, шонем. Экологий шотыштат яндар. А выставкылаш шке гыч ом лек, ӱжмашат толын огыл».
Республикыштына Марий Эллан 100 ий темме лӱмгечым вашлияш ямдылалтына. Тидан шуко мероприятий, пайрем, фестиваль, выставке-влак эртаралтыт. Кидмастар Николай Павлов шке семынже тудым вашлиеш, могай-гынат сувенирым ышта, орнамент дене сӧрастара. Ты датылан пура атым келыштарен. Моткоч сылнын коеш!