Порын шыргыжалын вашлийыт

Российысе #МыВместе акций почеш Марий Эл Республикыште Ресурсный рӱдерыште шоҥгыеҥ-влаклан полышым пуышо штаб почылтын. Тушто волонтёр толкынын активистше да самырык-влаклан мер оганизацийын еҥже-влак шке кумылын пашам ыштат.

Апрель гыч волонтёр-влакын штабышт республикысе чыла муниципалитетыште пашам ышташ тӱҥалыныт. Поро пашам шуктышо еҥ-влак кажне кечын инструктажым эртат, капын температуржым висат. Нунылан инфекций деч аралалташ средства-влак пуалтыт.

Волонтёр-влак, шке тазалыкыштым чаманыде, весе-влак таза лийышт манын, поро пашам ыштат. Ик тыгай рвезе – Константин Петров.

Костя Морко район Муналмаш ялыште шочын, йоча пагытше Йошкарэҥер ялыште эртен. Кокласола лицейыште тунеммыж годым ончыкыжым могай профессийым ойырен налаш манын, рвезе ятыр шонен. «Индешымше класс марте физмат направлений дене тунемаш пурем манын шоненам, илышем технический науко дене кылдынем ыле. Вара ачам ден авам медицине направлений дене тунемаш каяш темлышт, адакшым палыме врач-влак «тиде профессийлан шочынат» манын ойленыт. Сандене умбакыже биологий ден химийым келгын тунемаш тӱҥальым», – мане К.Петров.

Кызыт рвезе Марий кугыжаныш университетысе медицинский факультетыште кудымшо курсышто тунемеш. «Икымше курсышто тунеммем годым мыланна учебник-влакым пуышт. Нуным ужын, мый ӧрткышым. Тунемме литератур, методичке, препарат-влак… Документым налын, вес вере тунемаш каяш шонымаш ик гана веле огыл ушышкем толын. Медицине вузыш тунемаш пурышо кажне еҥ тыге шонен, очыни. Тылзевлак эртеныт, тунемаш тунар лӱдыкшӧ огыл улмым утларак да утларак умыленам. Кажне кечын ме у информацийым налынна, шукылан тунемын шуынна. Мый умылем: налме шинчымаш илышыште кӱлешан лиеш», – умбакыже ойла рвезе.

Костя, волонтёр пашаш кузе ушненат?

Кунам мемнам дистанционный тунеммашыш кусарышт, мый волонтёр толкын нерген пален нальым. Тунамак тушко ушнаш кумылем шочо. Волонтёр лияш – тиде илышым саемдаш полшышо мероприятий-влаклан шке жапетым муын моштымаш.

Волонтёр лияш лӱдыкшӧ огыл?

Неле ситуаций годым шке тазалыкет нерген от шоно, тӱҥ задаче – полышым йодшо-влак деке миен шуаш. Адакшым эн ондак ме тунемына, лӱдыкшыдымылык технике дене инструктажым эртена. Кажне кечын мыланна маскым, перчаткым пуат. Шукын тиде пашам куштылгылан шотлат. А риск группыш пурышо шоҥгыеҥ-влаклан тиде – кугу полыш. Вет нуно мӧҥгӧ гыч лектыт гын, тазалыкыштлан эҥгек лийын кертеш.

Шоҥгыеҥ-влак тендам кузерак вашлийыт?

Мемнам порын шыргыжалын вашлийыт. Шоҥгыеҥ-влак кокла гыч южышт шкетын илат, шукыштын тазалыкышт начар. Тыгодым воктенышт полышым пуышо лишыл еҥышт уке. Сандене мемнан кокла гыч кажныже кеч изирак поро пашам ыштен кертеш.

Пашаштыда ала нелылыкат вашлиялтеш?

Уке, тымарте нелылык вашлиялтын огыл. Ончыкыжымат чыла сай лиеш манын, ӱшаныме шуэш.