Порым ыштышылан вий утларак пуалтеш

Волжский район Ярамарий ялын ушан-шотан, пашаче, чолга эргыже В.А.Егоров тений 10 октябрьыште 65 ийым темен.

2017 ий годсек В.А.Егоров – Марий Эл Республикын Конституционный судшын председательжын алмаштышыже. Тылеч посна тудо Волгатехыште да МарГУ-што студент-влаклан шинчымашым пуа. Законностьым да правопорядкым пеҥгыдемдыме пашаште кугу надырым пыштымыжлан 2019 ий 17 сентябрьыште лукмо пунчал почеш «Марий Эл Республикын сулло юристше» почётан лӱмым пуэныт.

Илышыштыже Валериан Александрович эре оҥай пашам кычалын, нигунам карьерым ончыко шынден огыл.

Тудым шуктымо чыла пашашкыжат ӱжыныт, темленыт. Ик ганат пашадарын кугытшо нерген йодын огыл. Тудо кажне верыште шке сомылжым кӱлеш семын шуктен, еҥ-влакын илышыштлан сай йӧным ышташ шонен. Валерий Александрович деке полышым ондакат, кызытат йодын толыт.

А чумыр илышыжым авалтен ончалме годым В.Егоров республикын политике, образований да юридический сферылаштыже кугу надырым пыштымыжым ужына. Тиде теме-влак дене да осал паша, национальный лӱдыкшыдымылык ваштареш кучедалме шотышто 30 утла научный пашам возен. Монографийже-влакым савыктен, вес автор-влак дене пырля «Обществознание» учебникым ямдылен.

ФСБ-н Кӱшыл школжым тунем лекше марий рвезылан тӱняште ятыр верым ончен кошташ пӱралтын улмаш.

Туркмен ССР-ыште следовательлан, оперуполномоченныйлан, старший оперуполномоченныйлан ыштен. Вара Марий Элыш пӧртылын, 1986-1992 ийлаште КГБ-ште кӱлешан посна паша-влак шотышто следователь лийын, политически репрессироватлыме да раскулачиватлыме шотышто пашам виктарен. Налоговый полицийыште управленийым вуйлатышын алмаштышыжлан,  Марий Элысе Верховный Судын Судебный департаментшым вуйлатышылан ыштен. Кечывалым кугыжаныш службышто лийын гын, кастене да каныш кечылаште – студент-влак коклаште.

2000-2003 ийлаште Марий Эл Республикын Тӱҥ федеральный инспекторжо лийын. Ты паша тудлан путырак келшен.

Но…Политик пашаште тыгеат лиеда: шумо кӱкшыт гыч, кугу должность гычат трукышто кораҥаш логалеш. Марий мландылан кугу пайдам конден кертше виян айдемым шыгыремдылаш тӱҥалыныт. Тылеч вара В.А.Егоров образований пашаш куснен. Москошто, Санкт-Петербургышто кӱкшырак должностьым темленыт гынат, чон йодмо да лӱмлӧ профессор-влакын йодмыштым шотыш налын, республикыштак кодын. Патриот!

 

УМБАКЫЖЕ «Кугарня» газетын 2019 ий 18 октябрьыште лекше 42-шо (1556) номерыштыже лудса.