МарГУ-н студенткыже-влак Мария Исеметова ден София Кузьмина «Юл кундем федеральный округын медицине десантше» акцийыште участвоватленыт. Ӱдыр-влак 25 январь гыч 5 февраль марте ПФО-н медицине отрядше дене пырля Татарстанысе Заинск районысо яллаште илыше-влаклан икымше медицине полышым пуэныт, артериальный давленийым висеныт, диспансеризацийым да мо корштымым возен, районысо эмлыверын врачше-влаклан пуэныт.
Ты акцийыште 19 ӱдыр-рвезе лийыныт. Нуным Татарстан, Чуваший, Саратов да Самара областьла гыч, тыгак Марий Эл гыч ойырен налыныт. Тиде акций — шкешотан инноваций проект. Тудын авторжо – «Российысе студотряд-влак» мер организацийын татар пöлкаштыже медицине отрядым вуйлатыше Кристина Анатольевна Сидорова. Мария ден София Кристина Сидорова дене МарГУ-со «Авиценна» студотрядыш толмекышт палыме лийыныт да акцийыш ушнаш кумылаҥыныт.
МарГУ-што «Авиценна» студотрядым 2018 ийыште шыжым ыштеныт. Вуйлатышыже – Ирина Ведерникова (Мария ден София дене пырля тунемеш). Тушто университетын медицине факультетыштыже тунемше ӱдыр-рвезе-влак улыт. Вуйлатыше дене пырля студент-влак республикысе йочапöртлашке лектын коштыныт. Икымше медицине полышым пуымо шотышто йоча-влаклан мастер-классым эртареныт, таза илыш-йӱлам кучаш кӱлмö шотышто мутланеныт.
София Кузьмина ден Мария Исеметова МарГУ-н медицине факультетыштыже лечебное дело специальность дене кокымшо курсышто тунемыт.
София – чуваш ӱдыр. Новочебоксарск олаште шочын-кушкын. Школ деч вара медицине дене илышыжым кылдаш шонен. Тидлан лӱмын биологий да химий дене ешартыш занятийлашке коштын, репетитор дене заниматлен, Чувашийысе кугыжаныш университетыш тунемаш пураш ямдылалтын. Но тунам тусо медицине факультетыш тунемаш пураш бюджет вер лийын огыл улмаш. Ачаж ден аваже Софиям тораш колташ тоштын огытыл, садлан Йошкар-Оласе вузым ойырен налыныт. Ӱдырын ойлымыж почеш, тукымыштышт тудо икымше врач лиеш. Практикым шке оласе эмлымверыштыже эртен. Ординатурым Озаҥысе але Нижний Новгород оласе иктаж больницыште эрташ шона. Тидлан эшеат сайын да кыртмен тунемаш тӱҥалам мане. Яра жапыште ӱдыр сӱретлаш, волейболла модаш йöрата.
Мария – марий ӱдыр. Пошкырт кундем Краснокам район Можарсела гыч. Биологий да химий дене ЕГЭ-м сайын кучаш манын, туныктышо дене тыгак шкевуя ятыр заниматлен. Медициным молан ойырен налмыж нерген тыге каласыш:
— Школышто тунеммем годым лудаш моткоч йöратенам. 9-ше классыште Михаил Булгаковын чыла гаяк произведенийжым лудынам. Тылеч вара илыш шотышто шинчаончалтышем вашталтын. Еҥ-влаклан поро пашам ышташ кӱлмым умыленам. Тыге медицине пашаеҥ лиям манын, пеҥгыдын шканем шонен пыштенам. Марий Элыште ятыр родем ила, акамат тыштак. Садланак тысе вузым ойырен налынам.
Мариян аваже – бухгалтер, ачаже – агроном. Нунын ешыштыштврач-влак лийын огытыл. Ӱдыр ӱшана: илен-толын тудын профессийжым шуйышо-влак лийыт. Мария сайын мура, «Студент шошо» конкурсышто мастарлыкшым ончыктен. Но творчествылан кызыт жап моткоч шагал манеш, ӱдырын икымше верыште кызыт — тунеммаш. Садлан яра жапыштыже тӱрлö научный литературым шергалаш тырша.
Татарстан кундемыште поро пашам шуктымышт нерген ӱдыр-влак кумылын каласкалышт. Тӱҥ шотышто нуно медицине полышым вучышо еҥ-влак деке фельдшер-влак дене пырля лектын коштыныт. Нунын нерген сведенийым Заинскысе рӱдö эмлымвер гыч налыныт. Тушто «Медицине десант» проектым сайлан шотленыт.
А Мария ден Софиян тушто лиймышт деч вара тыгай проектым Марий Элыште ышташ кумылышт лектын. Кызыт кузе тудым ышташ лийме нерген шонкалат. Ӱдыр-влак тыгак моло кундемла гыч акцийыш ушнышо ӱдыр-рвезе-влак дене палыме лиймышт дене кугешнат. Нуно вашла шке шинчымашышт, тунемме верышт, олашт нерген каласкаленыт.
«Медицине десант» акцийыш ушнышо участник-влаклан илыме верым пуэныт, кечылан кум гана пукшеныт, яллашке лектын-кошташ транспортым ойыреныт. Тидыже грантым налме окса кӱшеш ышталтын. Студотряд вуйлатыше К.Сидорова «Юл кундем федеральный округын медицине десантше» проект дене самырык-влаклан «iВолга» форумышто палдарен да Юл кундем федеральный округышто гражданский общесте фонд деч 150 тӱжем теҥгеаш грантым налын.