Творческий пашаште тӱрлӧ сеҥымаш лиеш. Усталыкым аклыше еҥ-влак «Пашат томам» але «Кӱын шушо саска» манын аклат. Икте ик семын мастарлыкшым нӧлта, весе – вес семын. А тӱрлӧ ушем, организаций-влак нунылан полшен шогат.
Таче мутем Россий Писатель ушемын Марий Элысе пӧлкаж нерген лиеш. Тудо шуко пашам шукта. Тидын нерген Россий писатель ушемын Марий Элысе пӧлкажым вуйлатыше С.Д.Архипова дене мутланышна.
– Светлана Дмитриевна, 2019 ийыште Марий Элысе пӧлкаште могай вашталтыш-влак лийыныт?
– Россий писатель ушемын Марий Элысе пӧлкаштыже Россий Писатель ушемын 65 йыжыҥъеҥже уло. Шукерте огыл мемнан деке куан увер тольо: ты радамышке Игорь Поповым, Елизавета Егоркинам, Константин Бурнашевым, Раисия Сунгуровам, Екатерина Клюжевам пуртеныт. Теве Клюжева нерген ойлаш гын, самырык ӱдыр инженер-программистлан пашам ышта. Тудын йоча-влаклан рушла возымо ойлымашыже-влак ятыр журналлаште савыкталтыныт. 2012 ийыште самырык авторын «Ещё чашечку?» икымше книгаже лектын. Документ-влакым январьыште налаш каем. Тылеч посна тений ме Россий писатель ушемын йыжыҥъеҥже лийме дене Надежда Федосеевам саламлышна, членский билетым кучыктышна. Тудо тӱрлӧ савыктышым лончыла, критический статья-влакым возкала.
– Айста самырык-влаклан шуктымо пашада нерген каласен кодена.
– Апрельыште «Сылнымут алмаштыш» республиканский конкурсым эртарышна. Тышке шуко пашам колтеныт ыле. Призовой верлашке лекше ӱдыр-рвезе-влаклан пӧлекым, окса надырым кучыктышна. Оксам Марий Эл Республикысе тӱвыра, печать да калык-влакын пашашт шотышто министерстве ден Россий писатель ушемын йыжыҥъеҥже Василий Красновын вуйлатыме «Ший памаш» фонд ойыреныт. Ик тылзе гыч тыгаяк семинарым Пошкырт кундем Мишкан районышто эртарышна. Тушто йоча ден туныктышо-влак ты мероприятийлан чот ямдылалтыныт. Чылан марий тувырым чиен миеныт да почеламутлам наизусть лудыныт. Варажым «Сылнымут шыже» литературный семинар-совещанийым эртарыме. Икмыняр секций пашам ыштен. Тушто писатель-влак возаш тӱҥалше-влаклан ой-каҥашым пуэныт.
– Вес кугу пашада – книгам лукташ полшымаш. Тений ты сомыл кузе вораҥын толын?
– Автор-влак савыктышым шке кӱшеш луктыт, а южо книгалан ме проектым возена. Идалык мучко мемнан полшымо дене индеш сылнымут книга савыкталте. Мутлан, Яранскыште илыше автор Татьяна Рохлина Степан Разин годсо жапым ончыкта. Николай Блинковын «Где у луны половинка?» книгам лукташ полшышна. Москошто илыше да Россий писатель ушемын приёмный комиссийжын секретарьже, йоча писатель Светлана Вьюгиналан ондакат, теният книгам ямдылен пуэнна. «Эрвий» ден «Дружба» альманах-влак савыкталтыч. Лишыл кечылаште проект почеш йоча-влаклан мыйын ямдылыме «Сова с фонарём и жёлтые ушки» книгам кидыш кучена. Тиде савыктышым ятыр жап ямдыленна. Тусо сӱрет-влакым Мария Клюкина сӱретлен. 96 лаштыкан книга А4 формат дене лектеш.
– Тений марий писатель-влак тӱнямбал кӱкшытан мероприятийыштат участвоватленыт. Тидын нерген мом каласаш лиеш?
– Тений августышто Румынийыште эртаралтше Финн-угор писатель-влакын тӱнямбал конгрессышкышт марий писатель-влак миен коштна. Кум еҥан делегацийна Клуж-Напока олаште ик арня лие. Тушто докладым лудмо, секцийлаште участвоватлыме. Писательна-влак жапыштыже наградым налышт манынат азапланена. Тений Анатолий Мокеевлан, Татьяна Пчёлкиналан «Марий Эл Республикысе культурын сулло пашаеҥже» лӱмым пуышт. Марий Элын калык поэтше Геннадий Сабанцевым Чавайн лӱмеш Кугыжаныш премийлан темлышна. Республикнан 100 ияш лӱмгечыж вашеш Марий книга савыктыш ден Писатель ушемын регионысо пӧлкаже дене икмыняр антологий книгам савыктышна. Российыште илыше калык-влакын писательыштын пашаштым марлашке кусаренна. Поэзийым ик книгаш чумырымо, прозым – кок книгаш.
Марий книга савыктыш дене ныл ий ондак тӱҥалме пашам 2020 ийыште шуена. Марий писатель-классик-влак да кызытсе самырык автор-влакынат произведенийышт рушла савыкталтшаш. Тыгак «Марийская детская литература» антологийым ямдылена. Российыште илыше тӱрлӧ йылмыла дене возышо писатель-влакын пашаштым марлаш кусаренна. «Йоча поэзий антологий» ик том дене, а «Йоча прозо антологий» кок том дене савыкталтыт.
Россий писатель ушемын регионысо пӧлкаже идалык мучко ятыр пашам шуктен. Тыгодым тудым вуйлатыше С.Д.Архипован надырже изижак огыл. У ийыштат Писатель ушемын регионысо пӧлкаже ятыр сомылым палемден, да тиде тошкалтышыш кӱзаш вий-куат пышталтеш.