Парымет уло – тӱлӧ

Газетым лудшына-влак деч суд пристав-влакын пашашт шотышто йодыш-влак пуреныт ыле. Нунылан Суд пристав-влак федеральный службын Марий Элысе пӧлкажын СМИ дене пашам ыштыше тӱҥ специалист-экспертше Вера Чеховская вашешта.

Суд пристав-влак службо могай пашам шукта?

Суд пристав-влак федеральный службо исполнительный властьын федеральный органжылан шотлалтеш. Тудо судын палемдыме порядкыжым терга, судебный акт-влак дене пашам виктара да пунчалжым шуктымо да тергыме сомылым ышта.

Службын тӱҥ сомылжо – социально кӱлеш категориян исполнительный производствыла дене кылдалтше парымым погаш. Тиде тӱшкашке алимент, пашадар, ЖКХ услугылан да топливно-энергетический комплекслан окса парым, тыгак налоглан, уголовный штрафлан судын решенийжевлак пурат.

Тылеч посна должностной лица да уполномоченный орган-влак лӱмеш исполнительный акт-влак толыт. Тидыже – элгӧргӧ паша органын, Россий Пенсий фондын да РФ-ысе социальный страхований фонд пӧлка-влакын пунчалышт.

Калыкын кредит парымже шотышто могай ситуаций?

Суд пристав-влак федеральный службын Марий Элысе управленийыштыже 2020 ийыште куд тылзе жапыште 258000 исполнительный производство лийын. Тушеч 8%-ше кредит дене кылдалтын. Тидыже – 20000 исполнительный производство. Тичмаш суммыжо 6 млрд теҥге утла.

Парымым петыраш манын, пристав-влак могай пашам ыштат?

Судын пунчалжым жапыштыже шукташ манын, судебный пристав-исполнитель-влак тӱрлӧ йӧным кучылтын кертыт: мутлан, банк счёт гыч оксам поген налаш, погым арестоватлаш, Россий деч тораш колташ огыл але автотранспортым виктарымым чараш. Вара йодмашым шуктыдымылан административно але уголовно мут кучаш шогалтат.

Пандемийлан кӧра суд пристав-влакын пашашт кузе вашталтын?

Калык дене личный приём-влакым кызытеш огыт эртаре, но корреспонденцийлан посна келыштарыме яшлык уло. Парыман еҥын окса погыжлан банклаште але вес организацийлаште арест уло гын, ик сутка жапыште тергымаш эртаралтеш, да процессуальный пунчалым луктыт.

Лекше чыла йодышым 8(8362) 68-49- 03 телефон номер дене дежурный частьыш йыҥгыртен рашемден кертыда. Парымда улмым сайтыште тергыза але йодмашым возен кондыза.

Суд пристав-влак федеральный службын Марий Эл Республикысе управленийже парымда улмым ФССП-ын сайтыштыже «Банк данных исполнительных производств» сервисыште тергаш темла. Тергымеке, парымда улмым ужында гын, тыге тӱлыман:
 «Банк данных исполнительных производств» сервисыште онлайн;
 мобильный телефонысо «ФССП» приложений полшымо дене;
 Сбербанк интернет-банкысе личный кабинет дене («ФССП России» услугым ойырен налман);
 вигак тӱлаш лийме банкомат але терминал дене;
«Банк данных исполнительных производств» сервисыште квитанцийым печатлен лукташ да тудын дене банкыште тӱлаш. Тӱлымеке, парымда улмо сервисыште данный 3-7 кече гыч кораҥдалтеш але ужашым тӱледа гын, суммо вашталтеш.