Шошо толмо дене шӱм-чон ылыжеш, нарашта парча семын кумыл нӧлталтеш да леве йӱрын шымалыкше дене илыш пеледеш. Лач тыгай сылне пагытыште Ӱдырамаш-влакын тӱнямбал кечыштым палемдена. Тидым чылан ик семын вучат, шонем. А эн сай пӧлек садак – пеледыш аршаш. Лишыл еҥын пагалымашыже, порылыкшо да йӧратымашыже дене гына пиалан кечым пырля пайлет. Таче тӱрлӧ профессий дене пашам ыштыше ӱдырамаш-влак дене палдарена.
Пеледыш – эреак вучымо пӧлек
Наталия Юшкова, флорист.
Наталия Леонидовна ынде 21 ий лиеш, пеледышым ужала. Ондак Йошкар-Оласе рӱдӧ пазарыште, вара ик кугу кевытыште пашам ыштен. Ик палымыже «Ӱмыр мучко пазарыште от шого вет, верым вашталташ от шоно мо?» – йодын. Ынде Наталия Юшкован Морко посёлкысо Пушкин урем, 1-ше «б» номеран пӧртыштӧ «Натали», а Медведево поселкышто «Цветы» салонжо-влак улыт.
«Мый Волжский оласе ик училищыште лаборант-экологлан тунем лектынам, умбакшым медицине корным ойырынем ыле, но тунемаш шым кай. Окса чӱдылыклан кӧра кеч-могай пашам ыштен кертам, шоненам, а кунам пеледышым ужалыме дене илышем кылдалте, умыленам, тиде – мыйынак пашам. Тынар ийыште шке клиент-влакым муынам, нуно ончылгоч йодмашым пуат, толмашешышт, аршашым келыштарем. Эсолгыл Йӱдвелыште илыше-влак шке родыштлан пӧлекым ышташ йодыт. Мый ямде букетым телефоныш войзем да ончалашышт колтем, кутырен келшымеке, сомылнам умбакыже шуктена. Кызыт илышыште Интернет кугу пайдам конда: банк картыш онлайн-йӧн дене оксам колтат. Курьер кӱлеш адрес дене пеледышым наҥгаен пуа», – ойла флорист.
Наташа кажне пеледыш дене мутлана, аршашым келыштарымыж годым кидыштыже пӧрдыкта, чонлан келшышыш савыра. Садлан налше-влак салонышко пурат да «Пеледышда-влак пуйто ӱмбакемак ончат» маныт.
«Морко посёлкышто салонышто пашам ыштымем годым тидым шекланенам: еҥ-влак аршашым налыт да пуйто еҥ ужеш манын, вожылыт ыле: кеҥеж кечынат вӱдылаш йодыныт але пакетыш шылташ тыршеныт. Кызыт илыш вашталтын, ынде кеч пашаште коллегылан, тӱрлӧ пайремлан пеледышым пӧлеклат. Кажне пеледыш шке озажым, але оза шке пеледышыжым муэш манын кертам», – ойла Наталия.
Тудо Сергей пелашыж дене кок шочшым куштат. 16 ияш ӱдырышт аважлан полышкалаш йӧрата. А кокымшо классыште тунемше эргышт ачаж пелен пӧръеҥ пашалан тунем кушкеш. Вет Сергей кухньсо мебельым ыштыме дене куанжым муын.
«Тый пашаштет пеледышым ончен ситарет, тылат пӧлек гаят ок чуч дыр», – ойлат палымыже -влак. А Наташа тыге вашешта: «Ик пеледышым, кеч катлышым кучыктат гынат, чонемлан сайын чучеш. Мый тудым стаканыш шындем да ончен куанем. Ӱдырамашлан 8 Март кечын гына огыл, тыглаят пеледышм пӧлеклат гын, тудо эн пиалан улмыжым шижеш».